Gjykata e Elbasanit vendosi të shtyjë seancën për ish-kryebashkiakun e Kukësit, Safet Gjici, për datën 11 nëntor 2024, në orën 13:00.
Vendimi erdhi pas kërkesës së gjyqtares Suela Lika, e cila kërkoi që të gjitha provat e paraqitura nga avokati i tij t’i nënshtrohen procesit të verifikimit.
Gjithashtu, u urdhërua dorëzimi i të gjitha kartelave mjekësore të Gjicit që prej kohës së paraburgimit, si dhe një raport nga Institucioni i Ekzekutimit të Vendimeve Penale (IEVP) Lushnjë për dinamikën e vuajtjes së dënimit të tij. Një raport vlerësimi nga shërbimi i provës do të shqyrtohet gjithashtu në seancën e ardhshme, ku kartelat mjekësore do të analizohen nga ekspertët mjekësorë.
Ish-kryebashkiaku Safet Gjici, i cili aktualisht është i shtruar në një spital për shkak të problemeve shëndetësore, i është drejtuar Gjykatës me kërkesën për lirimin me kusht. Ai pretendon se vuajtja e dënimit ka arritur në masën ¾ dhe thekson se gjendja e tij shëndetësore është e rënduar, duke përfshirë probleme kardiovaskulare dhe diabet. Në kërkesën e tij, ai përmend gjithashtu arsye familjare që e justifikojnë lirimin e parakohshëm.
Gjici u dënua për “shpërdorim detyre” dhe “korrupsion” pas një video skandali që përfshinte edhe Alma Kacin.
i.b./dita
