Departamenti Amerikan i Shtetit ka reaguar pas deklarateve të fundit të kreut të PD Sali Berisha për “vendosje gjobash” nga ana e ambasadores amerikane Yuri Kim dhe i dërguari special për Ballkanin Perëndimor Gabrel Ecobar.
Në një komunikim për Report Tv, DASH i cilëson akuzat e Berishës qesharake.
“Akuzat e Sali Berishës, i cili u sanksionua nga Sekretari i Shtetit për korrupsion të theksuar, janë qesharake. Shtetet e Bashkuara janë qartësisht të përkushtuara ndaj demokracisë dhe luftës kundër korrupsionit”, theksohet në komunikatë.
Teksa na ndanë pak më shumë se 1 muaj nga zgjedhjet e ardhshme vendore, SHBA u bën thirrje të drejtpërdrejtë partive politike për zgjedhje të ndershme.
“Ne inkurajojmë të gjitha partitë politike që të angazhohen në diskurs konstruktiv dhe të mbështesin zgjedhje të lira dhe të ndershme”, thuhet në reagim.
Ky qëndrim i Departamentit Amerikan të Shtetit vjen menjëherë pas akuzave publike nga ish-kryeministri Sali Berisha i cili “i bëri thirrje” Kongresit Amerikan “të hetojë veprimtarinë e Ambasadores Yuri Kim dhe të dërguarit special për Ballkanin Perëndimor Gabrel Ecobar, me pretendimin se “po vendosin gjoba njëjtë si Mc Gonigal”.
m.b./dita