Në kuadër të zgjedhjeve vendore që do të mbahen më 14 maj, ambasadorja amerikane në Tiranë, Yuri Kim zhvilloi këtë të mërkurë takime me drejtues të Partisë Socialiste, Partisë Demokratike dhe Partisë së Lirisë.
Ambasadorja e SHBA thotë se i garantuan që do të verifikojnë figurën e kandidatëve që do të garojnë për kryetarë Bashkie që të jenë të pastër dhe të përmbushin kërkesat e ligjit si dhe i kujtoi vëzhgimet dhe rekomandimet e mëparshme të ODIHR-it.
“Shteti duhet të garantojë të drejtën për të zgjedhur lirisht dhe në fshehtësi. Çdo formë presioni për të zbuluar nëse dhe si kanë votuar njerëzit duhet të parandalohet.
Agjencitë ligjzbatuese duhet të intensifikojnë përpjekjet për të identifikuar, hetuar dhe ndjekur penalisht rastet e blerjes së votës. Qytetarët duhet të nxiten të raportojnë dhe të japin fakte për çfarëdo blerje votash apo presioni.
Shqipëria duhet të garantojë sigurinë e të dhënave personale të qytetarëve. Institucionet përkatëse duhet të hetojnë tërësisht dhe të ndëshkojnë çdo shkelje që ndikon në besimin e publikut në procesin zgjedhor.
Legjislacioni duhet të ndryshohet për të siguruar që mediat të jenë në gjendje të mbulojnë në mënyrë të pavarur aktivitetet e konkurruesve në zgjedhje me synimin për të kufizuar përdorimin në lajme të materialeve të prodhuara nga partitë”, janë rekomandimet që kujtoi Kim.
Fillimisht shkoi në selinë rozë ku u takua me sekretarin e Përgjithshëm të Partisë Socialiste Damian Gjiknuri, i cili tha se në fokus të diskutimit ishin zgjedhjet e ardhshme vendore të 14 Majit, situata aktuale politike në vend si dhe rekomandimet e ODIHR-it pas procesit të fundit elektoral.
o.j/dita
