Problemet e krijuara nga Donald Trump dhe politika e tij e tarifave ka shtyrë Kinën zyrtare të bëjë thirrje për një sjellje “racionale” nga Europa.
Agjencia “Reuters” citon median shtetërore, “Gobal Times” që evidenton se Kina është një opsion shumë i pranueshëm ekonomik për BE-në.
Lajmi vjen në kontekstin e një vizite që kreu i Tregtisë në Komisionin Europian, Maros Sefcovic, po zhvillon në Pekin, vizitë e cila provokoi kërcënimin për tarifa të reja nda automjeteve të importuara në SHBA.
Media kineze thekson se Kina është tashmë një ofertë shumë serioze për stabilitet dhe besueshmëri duke vënë në dukje se ajo është alternativa tregtare për Europën e vendosur me shpatulla për muri nga tarifat e Donald Trump. Nga ana tjetër, agjencia “Reuters” vë në dukje faktin që BE-ja të hapet me Pekinin do të duhet që Sevcovic të sqarojë disa shqetësime të vjetra si: sifdat e kompanive europiane që operojnë në Kinë, mungesa e aksesit në prokurime, pengesat në tregun e brendshëm.
Zëvendësimi i SHBA me Kinën në aspektin tregtar do të ishte një zhvillim me pasoja afatgjata pasi jo vetëm Kina përfaqëson një ofertë shumë të mirë, por edhe sepse me sanksionet ndaj Rusisë dhe kthesën e SHBA është e vështirë të rikthehet besimi. Po kështu partneriteti i ngushtë ekonomik me Kinën ndërlikon kohezionin e Perëndimit në një çështje si Tajvani dhe pretendimet e SHBA në Paqësor.
BE sfidon Trumpin
Bashkimi Europian do t’i përgjigjet tarifave të reja prej 25% të nënshkruara nga presidenti amerikan Donald Trump për makinat e importuara që hyjnë në SHBA.
Komisioni Europian përmes zëdhënësit, Olof Gill thotë se është duke përgatitur përgjigjen e tij për tatimin që hyn në fuqi më 2 prill.
Gill deklaroi se nuk mund të jepte një datë të saktë se kur BE do të vendoste tarifa reciproke ndaj Shteteve të Bashkuara, por tha se mund të jepte garanci se përgjigja do të ishte e fortë dhe në kohën e duhur për të arritur efektet e synuara.
“Nëse është e nevojshme, ne do të japim një përgjigje të fortë, proporcionale, të fuqishme dhe të mirëkalibruar dhe në kohë ndaj çdo mase të padrejtë dhe kundërproduktive nga SHBA-ja”, shprehet Olof Gill, zëdhënësi i KE-së.
Ndërsa Kanadaja tha se do t’i përgjigjej masës së re të njoftuar nga Trump, Mbretëria e Bashkuar duket se nuk dëshiron të përshkallëzojë luftën tregtare me SHBA-në. Ministrja britanike e financave Rachel Reeves, tha se për momentin Britania nuk është në pozicionin që të marrë masa që çojnë në përshkallëzimin e situatës.
Franca dhe Gjermania janë mes vendeve që po bëjnë thirrje për një përgjigje të fortë të Bashkimit Evropian ndaj tarifave të reja të SHBA që godasin industrinë evropiane të makinave.
Trump e konsideroi vendimin të drejtë por edhe shpagim për të gjitha to vende që tha se ndër vite kanë përfituar në kurriz të shteteve të bashkuara. Vetëm vitin e kaluar Shtetet e Bashkuara importuan automjete me vlerë 474 miliardë dollarë nga vende si Gjermania, Kanadaja, Meksika, Koreja e Jugut dhe Japonia.
Trump argumentoi më tej se tarifat do të gjenerojnë miliarda dollarë të ardhura shtesë për SHBA-në. Këto para sipas tij, janë të mjaftueshme për të ulur taksat dhe për të ndihmuar në shlyerjen e borxhit të jashtëm, ndërsa nga ana tjetër nga nisma supozohet të përfitojë edhe industria vendase e automjeteve.
Presidenti amerikan beson se për të shmangur tarifat, prodhuesit e makinave në të ardhmen do të prodhojnë tërësisht në SHBA, edhe pse kjo siç pohoi ai, nuk ka për të ndodhur brenda ditës. Megjithatë, ekspertë të ekonomisë paralajmërojnë se gjërat mund të mos shkojnë saktësisht sipas planit të Trumpit. Ata theksojnë se impakti i parë i kësaj nisme do të jetë një rritje masive e çmimit të makinave për konsumatorët amerikanë
