Tekniku gjerman i Liverpool, Jurgen Klopp, doli sot para gazetarëve në konferencën e zakonshme që mbahet një ditë para ndeshjes në Champions, ku e presin në Spanjë kampionët në fuqi të Real Madrid, në një takim kthimi që pritet të jetë emocionant.
Edhe pse u turpëruan në “Anfield” rreth një muaj më parë, ku nuk ruajtën dot avantazhin 2-0 dhe panë t’u përmbysej në 2-5 nga “los blancos”, trajneri nuk i ka humbur shpresat dhe pret një tjetër lojë nga ekipi. Në fakt, teknikut gjerman s’i ka shkuar aq mirë ‘beteja’ me madrilenët tek ekipi anglez, ku ka humbur dy finale Champions më 2018 dhe 2022, por edhe disa takime në fazën paraprake të kompeticionit, duke u eliminuar.
Klopp tha se shumë njerëz e konsiderojnë skuadrën e tij të “vdekur”, por atij i pëlqen të luftojë nëse ka sikur edhe 1 për qind shans. “100 për qind të atyre që janë këtu në sallë besojnë dhe mendojnë se ne s’kemi asnjë shans. Por ju them se duhet luajtur dhe provuar, edhe sikur të kesh 1 për qind shanse. Më pëlqen ta tentoj”, tha tekniku, që ka disa mungesa. Më tej lavdëroi kompetitivitetin e madrilenëve në këtë event futbollistik dhe nuk i nënvlerësoi. Takimi zhvillohet të mërkurën në mbrëmje, ora 21:00.
