Uniformat blu janë përfshirë në një tjetër incident dhe këtë herë vizual, në rrjetet sociale. Në media kanë qarkulluar komunikime të efektivëve në grupin e chatit të Komisariatit nr.1, ku bëjnë komente deri seksiste ndaj qytetarëve që depozitojnë ankesa apo denoncime dhe kërkojnë ndihmë për çështje të ndryshme. Bëhet fjalë për një vajzë të humbur, ndërsa shefat në komunikimin e tyre në rrjetin social Whatsapp, flasin për të me komente seksiste. Sipas asaj që shkruhet në chat, vajza është vetëm 18 vjeçe, ndërsa ndaj saj komentohet “ça modeli është”, “Çfarë viti prodhimi” apo dhe “shihe nga parakolpi”. Si pasojë e kësaj ka ardhur edhe një reagim zyrtar edhe nga Policia e Tiranës, që konfirmoi hetim disiplinor për 3 nga efektivët.
“Menjëherë pas marrjes dijeni, Drejtoria e Standardeve Profesionale në Drejtorinë e Përgjithshme të Policisë së Shtetit ka pezulluar nga detyra, për një periudhë 30-ditore, Shefin për Krimet në Komisariatin e Policisë Nr. 1, në DVP Tiranë, Komisar R. D., për shkelje të rëndë disiplinore, të parashikuar nga neni 204 i rregullores së Policisë së Shtetit”, thuhet në njoftimin zyrtar. Dhe në fakt vajza e re rezultonte e zhdukur pa lënë gjurmë, teksa familjarët bënë denoncimin dhe kërkuan ndihmën e bluve për gjetjen.
Pjesë nga biseda mes policëve:
R.: Kjo vajzë është larguar nga banesa. Të shoqërohet në komisariatin më të afërt.
Ina: Çfarë viti prodhimi është shef?
R.: Vit i fundit duket.
P.: Shikoje Ina, nga prapakolpi.
Ina: Si urdhëron shefi, fshati që duket, s’ka nevojë për kallauz….
Njoftimi i Policisë së Shtetit:
“Në lidhje me një postim në rrjetet sociale, në të cilin pasqyrohet komunikimi joetik në një grup komunikimi në platformën WhatsApp, midis disa punonjësve të Policisë të Komisariatit të Policisë Nr. 1, Tiranë, ju bëjmë me dije se:
Menjëherë pas marrjes dijeni, Drejtoria e Standardeve Profesionale në Drejtorinë e Përgjithshme të Policisë së Shtetit ka pezulluar nga detyra, për një periudhë 30-ditore, Shefin për Krimet në Komisariatin e Policisë Nr. 1, në DVP Tiranë, Komisar R. D., për shkelje të rëndë disiplinore, të parashikuar nga neni 204 i rregullores së Policisë së Shtetit.
Gjithashtu, Drejtoria e Standardeve Profesionale në Policinë e Shtetit, nën drejtimin e AMP-së, vijon punën për kryerjen e një hetimi të plotë administrativ për këtë rast.
Policia e Shtetit është e vendosur për të ndëshkuar cilindo punonjës policie që cenon imazhin e Policisë dhe besimin e qytetarëve te Policia e Shtetit”.
