Kosova humbi shansin e artë për 3 pikët ndaj një ekipi modest si Andorra, por edhe për të qenë afër kryesimit në grup, pas barazimit në Izrael. Tjetër barazim për Kosovën në Grupin I të eliminatoreve të Euro 2024. Sërish me rezultatin 1-1 si në Izrael. Dardanët gabuan në “Fadil Vokrri” përballë Andorrës, sfidë që duhej fituar me çdo kusht. Një paraqitje të dobët ka bërë edhe trupa gjykuese austriake, duke mohuar disa raste të dukshme për penallti ndaj kosovarëve, sidomos ai i munitave të fundit të takimit, ku Zhegrova pretendoi për faull në zonë pas rrëzimit.
Djemtë e Alain Giresse dhanë fare pak, pavarësisht dëshirës. Kosova zhvilloi një lojë të vakët dhe mori vetëm një pikë. Edon Zhegrova zhbllokoi takimin pas një shpërthimi në minutën e 59’.
Asist i bukur i Milot Rashicës dhe finalizim i sulmuesit të Lille. Festa në stadium zgjati vetëm dy minuta, pasi Berto Rosas përfitoi nga pasiguria e lojtarëve vendas dhe barazoi takimin.
Kosova u hodh në sulm, pretendoi në 3 raste për penallti, por nuk ia doli të gjente golin e fitores. Kujtojmë se Rumania mori një fitore me vlerë ndaj Bjollorusisë 2-1 dhe Zvicra ndaj Izraelit 3-0, duke kryesuar të dyja grupin me nga 6 pikë në dy ndeshjet e para.
