Plarent Ndreca do të jetë deputeti më i ri në Kuvendin e Shqipërisë, duke zërë vendin e Arben Ahmetajt.
Kreu i KQZ, Ilirjan Celibashi mori vendimin për t’i dhënë mandatin ndërsa më pas ai do të betohet në seancën plenare.
Kjo lëvizje vjen pasi Dallëndyshe Bici refuzoi mandatin e deputetes së PS-së.
“Pas verifikimeve të kryera me kandidatin e radhës Plarent Ndreca, vendos dhënien e mandatit deputetit të kuvendit të Shqipërisë, kandidatit të radhës të listës shumëemërore të PS-së për zonën zgjedhore qarku Tiranë, zotit Plarent Ndreca”, theksoi Celibashi në mbledhjen e sotme.
Pak ditë më parë, Dallëndyshe Bici i ktheu përgjigje Komisionit Qendror të Zgjedhjeve, se nuk do të pranojë plotësimin për vakancën e krijuar pasi Arben Ahmetaj e humbi mandatin e deputetit.
“Ju bëj me dije se nuk do të vijoj procedurat ligjore përkatëse për marrjen e mandatit të deputetit në Kuvendin e Shqipërisë, për shkak të angazhimit tim në detyrën funksionale që ushtroj aktualisht në institucion qendror”, thuhej në shkresën e Bicit.
j.l./ dita
