Huatë që nuk kthehen në afat në banka, në raport me totalin, i janë rikthyer rënies në qershor, pasi kishin shfaqur tendencë rritëse në dy muajt e mëparshëm. Sipas statistikave të Bankës së Shqipërisë, treguesi “Huatë me probleme (bruto) ndaj totalit të huave” zbriti në 4.7% në qershor, nga 4.81% që kishte qenë muajin e mëparshëm.
Gjithsesi ai mbetet mbi nivelin më të ulët historik prej 4.64%, që u arrit në mars 2024. Rritja e kredive me probleme në prill e maj duket se ishte e lidhur më shumë me efektin e rritjes së normave të interesit në euro, sipas analizave të Bankës së Shqipërisë.
Segmenti ku është vërejtur rritja e kredive me probleme është kryesisht kredia për blerjen e pasurive të paluajtshme në euro, veçanërisht në segmentin e individëve. Për Bankën e Shqipërisë një rritje ishte e pritshme, duke pasur parasysh rritjen e fortë të normave të interesit për monedhën europiane, deri vitin e kaluar.
Banka Qendrore Europiane rriti me një ritëm të shpejtë normën bazë të interesit, duke arritur nivelin rekord historik prej 4.5%, në vjeshtën e vitit të kaluar. Kjo rritje u përcoll në interesat e tregjeve financiare dhe në treguesin kryesor benchmark që përdoren për kuotimin e kredive me norma të ndryshueshme interesi në euro, Euriborin.
Në fund të shtatorit 2023, Euribori arriti nivelin 4.23%, më i larti në 15 vitet e fundit. Euribori 12-mujor është treguesi kryesor benchmark që përdoret për ndërtimin e kredive me norma të ndryeshueshme interesi edhe nga bankat shqiptare. Gjithsesi, qershori solli një stabilizim të këtij treguesi. Ndërkohë, sipas Bankës së Shqipërisë, kredia për sektorin privat ka vijuar të ketë një ecuri pozitive në tremujorin e dytë.
“Ritmi i rritjes së kredisë ka ardhur në rritje, duke regjistruar nivelin 14.6% në muajin qershor. Zgjerimi i kredisë vijon të mbështetet – në masën më të madhe —nga rritja e shpejtë e portofolit të kredisë në lekë, në pasqyrim të nivelit të ulët të normave të interesit.
Po ashtu, zgjerimi i kredisë vijon të ketë një bazë të gjerë, duke mbuluar nevojat e bizneseve dhe të familjeve, si për investime ashtu edhe për konsum e kapital qarkullues. Në të njëjtën kohë, portofoli i kredisë vijon të ketë një cilësi të mirë, sikundër dëshmohet nga nivelet e ulëta të treguesit të kredisë me probleme”, sipas deklaratës së fundit të BSH-së./ Monitor
