Kremlini ka reaguar pas humbjes së partisë së Aleksandar Vuçiçit në zgjedhjet parlamentare në Serbi, ku lëvizja e mbështetur nga studentët shënoi një fitore të thellë.
Moska, e cila e konsideron Serbinë një partnere të rëndësishme në Evropë, shprehu vlerësimin për Vuçiçin dhe shpresën se marrëdhëniet mes dy vendeve do të vazhdojnë edhe pas ndryshimit të pushtetit.
Zëdhënësi i Kremlinit, Dmitry Peskov, deklaroi se Rusia e ka marrë në konsideratë rezultatin e zgjedhjeve dhe vlerësoi kontributin e Vuçiçit në zhvillimin e marrëdhënieve dypalëshe.
“Ne e vlerësojmë shumë kontributin që zoti Vuçiç ka dhënë në zhvillimin e marrëdhënieve tona dypalëshe. Jemi të vetëdijshëm se ai do të vazhdojë të jetë aktiv në politikë dhe shpresojmë që, edhe në opozitë, të vijojë të kontribuojë në zhvillimin e marrëdhënieve tona”, tha Peskov.
Ai u shpreh gjithashtu se Moska shpreson që forcat e reja politike që do të vijnë në pushtet të kuptojnë rëndësinë e bashkëpunimit me Rusinë për interesat e Serbisë.
“Shpresojmë që veprimet e forcës së re politike që do të vijë në pushtet si rezultat i zgjedhjeve të jenë të orientuara në mënyrë konstruktive drejt zhvillimit të mëtejshëm të marrëdhënieve dhe që këto forca të kuptojnë se bashkëpunimi me Rusinë është në interes të Serbisë, sepse i sjell përfitime vendit”, deklaroi zëdhënësi i Kremlinit.
Peskov shtoi se Rusia synon të bëjë gjithçka që është e mundur për të nxitur zhvillimin e marrëdhënieve me Beogradin, duke theksuar se bashkëpunimi kërkon vullnet nga të dyja palët.
Serbia synon anëtarësimin në Bashkimin Evropian, por nuk iu bashkua sanksioneve të mbështetura nga BE-ja kundër Rusisë për shkak të luftës në Ukrainë. Ndërkohë, Beogradi ka vazhduar të ruajë lidhje të ngushta ekonomike, politike dhe ushtarake me Moskën, e cila mbetet një furnizuese e rëndësishme e energjisë për vendin.
Humbja elektorale e aleatit të Moskës vjen gjashtë muaj pas humbjes në zgjedhje të Viktor Orbanit në Hungari, një tjetër partner i rëndësishëm i Rusisë në Evropë.
Megjithatë, mbetet për t’u parë se si do të qeverisin drejtuesit e rinj të mbështetur nga studentët dhe çfarë drejtimi do të marrë politika e jashtme e Serbisë, veçanërisht marrëdhënia e saj me Rusinë dhe procesi i integrimit evropian.
j.l./ dita
