Duke e cilësuar si një akt terrorist sulmin e armatosur ndaj godinës së “Top Channel”, ku mbeti i vrarë një nga punonjësit e sigurisë, kreu i Këshillit të Lartë të Prokurorisë, Alfred Balla, i ka kërkuar prokurorisë zbardhjen sa më shpejt të ngjarjes.
“Ngjarje vërtet e rëndë ajo e orëve të para të mëngjesit të sotëm ku godina e televizionit kombëtar “Top Channel” është qëlluar me armë, e ku për pasojë ka humbur jetën roja i sigurisë Pal Kola.
Teksa i shpreh në emër të KLP-së ngushëllime familjes së Kola, Kryetari i Këshillit të Lartë të Prokurorisë Alfred Balla shpreh indinjatën ndaj këtij akti terrorist dhe kërkon nga prokuroria e kryeqytetit dhe nga ajo e posaçme ta zbardhin sa më shpejt dhe me përgjegjshmërinë më të lartë këtë ngjarje kriminale, e të dërgojnë përpara ligjit autorët”, shkruhet në reagimin e KLP-së.
p.k\dita