Zëvendës Ndihmës Sekretari i SHBA-ve për Çështjet Europiane Gabriel Escobar, në një intervistë televizive u shpreh se marrëdhënia e SHBA-vë ka në fokus popullin shqiptar dhe jo partitë politike apo ndonjë person në veçanti.
I pyetur në lidhje me ndonjë problematikë që mund të lindë me pastërtinë e figurave të kandidatëve që garojnë më 14 maj për zgjedhjet vendore, Escobar u shpreh se reagimet duhet të vijnë nga populli shqiptar dhe jo nga Amerika.
“Unë mendoj se të gjitha partitë politike kanë një detyrim ndaj njerëzve që të sigurohen që kandidatët të mos jenë të korruptuar, që ata të kenë në zemër interesat e njerëzve. Ne nuk jemi në gjendje të zgjedhim kandidatë apo anëtarë të partive politike. Marrëdhënia jonë me Shqipërinë është me popullin e Shqipërisë, jo me një parti dhe jo me një person.
Pra, në këtë drejtim, kur pyet nëse do të ketë një reagim nga Shtetet e Bashkuara nëse partitë nuk janë të pastra, nëse kandidatët nuk i përmbushin standardet më të larta të antikorrupsionit dhe të gjitha standardet e tjera demokratike, reagimi duhet të vijë nga njerëzit, jo nga Shtetet e Bashkuara. Kjo është një punë për popullin e Shqipërisë, jo për Shtetet e Bashkuara”, u shpreh zyrtari amerikan.
m.b./dita
