Kryeministri Edi Rama ka nisur një vizitë zyrtare në Zagreb të Kroacisë. Ai u prit me një ceremoni nga homologu i tij Andrej Plenkoviç.
Në konferencën e përbashkët për shtyp kryeministri kroat tha se dënon sulmin ndaj policisë së Kosovës, që siç tha tregon qartë se kemi të bëjë me një sulm të planifikuar.
Ai u shpreh se qëndrimi i faktorit ndërkombëtar duhet të jetë i qartë në mbështetje të Kosovës, që është në mbrojtje të territorit të vet.
“Kroacia dënon sulmin ndaj policisë së Kosovës, që nisur nga armatimet e gjetura tregon qartë se kemi të bëjë me një sulm të planifikuar. Është një sinjal i fortë që tregon se ka forca që duan të destabilizojnë situatën në Kosovë dhe rajon. Reagimi i BE, KFOR, NATO duhet të jenë të qarta dhe të forta dhe të përkrahin institucionet e Kosovës. Duhet të bëjmë maksimumin për normalizimin e situatës. Komuniteti Ndërkombëtar ka treguar se e ka vëmendjen aty dhe po e sheh me kujdes. Ajo që ne dimë janë masa që BE mund të ndërmarrë ndaj Serbisë. Ministrat e Jashtëm janë takuar në Kiev sot dhe besoj se në takim është folur edhe për këtë temë”, tha ai.
