Kryetarja e Kuvendit, Lindita Nikolla u takua sot me Presidentin e Dhomës së Deputetëve, z. Lorenzo Fontana. Kryeparlamentarja Nikolla, ishte e shoqëruar në takim nga zv/kryetarja e Kuvendit, Ermonela Felaj Valikaj, zv/kryetari, Agron Gjerkmarkaj, kryetari i grupit parlamentar të miqësisë me Italinë, Arben Pëllumbi, si edhe ambasadorja e Shqipërisë në Itali, znj. Anila Bitri Lani.
Në takimin me Presidentin e Dhomës së Deputetëve, z. Lorenzo Fontana, Nikolla vlerësoi angazhimin politik të qeverisë italiane dhe nismën e Dhomës së Deputetëve për të alokuar fonde për zbatimin e marrëveshjes për sigurimet shoqërore dhe i sugjeroi presidentit Fontana përfundimin sa më shpejt të këtij procesi.
Gjithashtu, Nikolla kërkoi mbështetjen e Italisë për anëtarësimin e Kosovës në KiE si edhe për Rezolutën e Kuvendit të Shqipërisë “Mbi pretendimet e pabazuara për trafikim të paligjshëm të organeve njerëzore në Kosovë dhe Shqipëri”, si një domosdoshmëri absolute për pajtimin dhe stabilitetin afatgjatë në Ballkan.
Presidenti i Dhomës së Deputetëve të Italisë, z. Lorenzo Fontana, vuri në dukje se bashkëpunimi dypalësh mes Italisë dhe Shqipërisë do të vijojë në të gjitha fushat dhe po kështu edhe mbështetja për integrimin evropian të Shqipërisë dhe Ballkanit Perëndimor, i cili e ka vendin në BE.
m.b.dita
