Kjo kishë ndodhet buzë fshatit Leusë në Përmet. Pjesa e përparme e kishës është si manastir, kurse vetë kisha është si tempull, dhe rrethohet nga 3 përrenj të mëdhenj që dalin nga malet dhe derdhen në lumin Vjosa.
Kisha është rikonstruktuar në vitin 2000. Është e tipit bazilikas, ndërtuar në fund të shekullit XVIII, mbi një objekt të shekullit VI. Ka një naos të ndarë në 3 nefe, ku nefet anësore janë të mbuluara me kësulë sferike, ndërsa nefi qendror me qemer cilindrik.
Kupola ngrihet mbi tamburin e ngushtë të lartë dhe në hapësirën e mesit ndodhen 12 dritare.
E gjithë ndërtesa është e ndërtuar me gurë vendi dhe e mbuluar me rrasa guri. Kisha ka edhe një mbishkrim të pikturuar mbi portën e hyrjes, i cili dëshmon mjeshtërinë e atyre që e punuan.
Pikturat murale janë të vitit 1812 ndërsa ikonostasi i gdhendur mban datën 1817. Vlera të veçanta artistike kanë afresket dhe ikonostasi i gdhendur në dru arre.
Pamjet dhe kompozimet në dru të marra nga Bibla dhe nga natyra kanë një stil dhe mjeshtëri të lartë.
—
Marrë nga rubrika ENCIKLOPEDI, që botohet në versionin print të gazetës DITA
