Vetëm dy vite më parë, Christopher Lanive ishte komandant i Divizionit të 82-të Ajror dhe njihej për disiplinën e ashpër, ndalimin e telefonave celularë gjatë stërvitjeve dhe insistimin që ushtarët të përdornin vetëm pajisje standarde ushtarake.
Sot, ai po përgatitet të marrë një nga postet më të rëndësishme në ushtrinë amerikane, me mbështetjen e plotë të presidentit Donald Trump dhe sekretarit të Mbrojtjes Pete Hegseth.
Lanive, që shumë ushtarë e konsideronin tepër të rreptë dhe “të modës së vjetër”, fitoi reputacion si një komandant i fokusuar te rikthimi i disiplinës tradicionale në ushtri. Ish-gjenerali Keith Kellogg, një figurë me ndikim në rrethin e Trump, tha se Lanive “e riktheu Divizionin e 82-të Ajror te stërvitja dhe vlerat tradicionale”.
Si komandant i Divizionit të 82-të Ajror, Lanive vendosi rregulla të forta disiplinore, përfshirë ndalimin e alkoolit gjatë aktiviteteve tradicionale të njësisë dhe kufizime të tjera që nuk u pritën mirë nga shumë ushtarë.
Karriera e tij mori kthesë vendimtare në Korenë e Jugut, ku gjatë një videokonference për inaugurimin e mandatit të dytë të Trump ai tërhoqi vëmendjen e presidentit amerikan.
“Mirë se u kthyet, zoti President”, tha Lanive gjatë lidhjes video me Trump, i cili reagoi me humor duke pyetur turmën: “A është ky njeri në qendër të përzgjedhjes së aktorëve apo jo?”
Që prej marrjes së detyrës, Hegseth ka larguar ose lënë mënjanë disa gjeneralë të lartë, ndryshime që kanë ndihmuar edhe avancimin e Lanive në hierarkinë ushtarake amerikane.
“Gjenerali Lanive është pikërisht lloji i liderit që i duhet ushtrisë amerikane tani. Pa politikë, pa budallallëqe dhe i fokusuar te forca e ushtrisë”, deklaroi Hegseth.
j.l./ dita
