Prokuroria e Tiranës njoftoi se ka sekuestruar pasuri me vlerë mbi 500 mijë euro të një polakeje, në vazhdë të hetimit pasuror për gjermanin Stephan Morgenstem, i cili u arrestua në gusht 2023 në Rinas.
Ai ishte në kërkim nga Koreja e Jugut dhe shtete të tjera nën akuzë për mashtrim.
Në sekuestro është vendosur një vilë në periferi të Tiranës, në Lundër, si edhe dy garazhe.
Po kush është Stephan Morgenstem?
Gjermani me banim në Dubai duhet te perballet në Korenë e Jugut me një dënim të përjetshëm.
61-vjeçarit, së bashku me bashkëpunëtorët e tij, i janë sekuestruar pasuri dhe llogari bankare në shumën totale prej rreth 123 milionë euro.
Gruaja e Morgenstern dhe bashkëpunëtorët e tjerë janë nën vëzhgim për rolet e tyre në ndihmën për fshehjen dhe shpërndarjen e fondeve të vjedhura.
Në dhjetor 2022, Morgenstern u arrestua në Greqi ndersa po tentonte një fluturim për në Dubai. Pasi u vendos në arrest shtëpie nga një gjykatë greke, ai u arratis në Shqipëri, ku qëndroi i fshehur, por u kap në aeroportin e Tiranës, ndërsa priste mbërritjen e gruas së tij nga Dubai.
Urdhri i leshuar nga Koreja e Jugut kërkon konfiskimin e pasurive të paluajtshme, automjeteve luksoze dhe investimeve të tjera të tij.
Kompania problematike e këtij personi quhet Futur-net, që pretendon se u shet investitorëve paketa reklamimi. Futur-net lançoi Futuro-coin, asetin e tij dixhital, por gjithçka u shkatërrua kur autoritetet polake e shpallën kompaninë një skemë piramidale.
Autoritetet koreane njwkohwsisht akuzuan Morgenstern dhe ortakun e tij se kishin mashtruar rreth 1.000 investitorë koreanë për miliona dollarë.
Dy mashtruesit posedonin pasaporta diplomatike nga Gambia, që i kishte lejuar ata të udhëtonin deri tani pa u prekur në mbi 80 vende në mbarë botën – shkruan VoxNews.
Por arratisë dhe luksit me sa duket i ka ardhur fundi.