Mesfushori i Kombëtares shqiptare, Qazim Laçi, ka folur në një konferencë për mediat para takimit me Poloninë.
Ai u shpreh se detajet do të bëjnë diferencën në këtë ndeshje, teksa shtoi se gjithë skuadra është gati për të arritur objektivin e Botërorit.
“Të dyja ekipet mendoj se e meritojnë të jenë në Kualifikueset e Botërorit. Detajet e vogla do të bëjnë diferencën. Duhet të kemi parasysh që ndeshja mund të shkojë dhe më shumë. Ne do të futemi nga minuta e parë dhe ta mbyllim sfidën brenda 90 minutave.
Kur është ndeshja jashtë shtëpisë, mendoj se do na japë një motivim më shumë. Do të kemi pak tifozë në tribunë, por shumë tifozë nga e gjithë bota që do na ndjekë. Besoj se ai do jetë motivimi më i madh që do kemi. Edhe ju si gazetarë, edhe ne si lojtarë, e kemi pasur gjithmonë një ëndërr për të parë Shqipërinë në Botëror. Kemi një kundërshtar të fortë, ndërsa po kaluam, kemi dhe një ndeshje të dytë. Duhet të shohim njëherë ndeshjen me Poloninë dhe të bëjmë më të mirën. Kemi punuar shumë, kemi sakrifikuar shumë dhe duhet të besojmë.
Në Kombëtare nuk kemi shumë kohë të përgatitemi. Kemi shumë kohë që jemi bashkë. Grupi është thuajse i njëjtë, me ndryshime të pakëta. Me çdo lojtarë ndihem mirë.
Edhe unë personalisht kam bërë një Europian dhe tani më mungon një Botëror. Goliun në Europian do ta ndryshoja me një gol që na dërgon në Botëror. Ai është momenti më i bukur i imi, por tani mund të jetë ky momenti më i bukur.
E dimë që do jetë një ndeshje shumë e vështirë. Nuk parashikojmë ekipin polak. Sigurisht që do e analizojmë, por do fokusohemi më shumë te loja jonë dhe te mënyra si do e përballojmë këtë ndeshje. Stadiumi do të jetë plotë. Për ne është një motivim më shumë për të bërë krenar popullin shqiptar”, tha Laçi.
j.l./ dita
