Frank Lampard regjistroi një tjetër humbje në aventurën e dytë si trajneri i Chelsea. Pas disfatës 1-0 ndaj Wolves në kampionat, “Blutë e Londrës” u mposhtën 2-0 në “Santiago Bernabeu” nga Reali i Madridit.
Skuadra londineze do të synojë përmbysjen dhe kualifikimin në gjysmëfinalet e Champions League në takimin e kthimit. Edhe pse është një mision i vështirë, trajneri beson fort te suksesi në shtëpi. “Jam krenar për atë që bëmë kur ishim me dhjetë lojtarë, por u zhgënjeva nga fakti që iu dhuruam golin e dytë. Na mungoi disi vetëbesimi. Lojtarët duhet ta kuptojnë se kanë shumë potencial.
Ndeshja e kthimit? Ju thashë djemve se në Stamford Bridge mund të ndodhin gjëra të veçanta. Real Madrid është një skuadër e shkëlqyer, por ne duhet të besojmë te përmbysja. Duhet të rrisim nivelin e lojës, duhet ta kemi të qartë se kemi nevojë për pozitivitet mendor”, deklaroi trajneri i Chelsea.
