Ministrja e Ekonomisë dhe Financave, Delina Ibrahimaj, pas një takimi me shoqatën e eksportuesve ka bërë me dije vendimet e marra për të minimizuar efektet negative që vijnë nga zhvlerësimi i euros.
Në një deklaratë për mediat, Ibrahimaj tha se dy masat afatshkurtra të marra, për t’i mundësuar eksportuesve më shumë likuiditet, janë mospagimi i kësteve të tatim-fitimit deri në fund të vitit 2023, si dhe rimbursimi i TVSH-së për 3 ditë, nga 30 që ishte më parë. Do të përfitojnë kompanitë që eksportojnë më shumë se 70% të qarkullimit dhe prodhimit të tyre
Po ashtu ministrja shtoi se do të krijohet një grup pune i përbashkët mes Ministrisë, Bankës së Shqipërisë, shoqatës së bankave dhe shoqatave të eksportuesve, për kryerjen e parashikimeve të përbashkëta dhe më pas marrjen e masave.
“Shqetësime në lidhje me vlerësimin e monedhës vendase dhe zhvlerësimin e euros. Kemi diskutuar mbi problematikën dhe ne kemi analizuar shqetësimin e zhvlerësimit të monedhës euro. Ne kemi vendosur që Ministria, me qëllim dhënien e një zgjidhje afatshkurtër, për rritjen e likuiditeteve të kompanive eksportuese të ngurtësoje parapagimin e kësteve të tatim-fitimit për të gjitha kompanitë që eksportojnë më shumë se 70% të qarkullimit dhe prodhimit të tyre. Kemi përgatitur një akt normativ që do miratohet së shpejti në mënyrë që të ketë rritje të likuiditetit që kompanitë kanë në dispozicion.
Do marrim masa që rimbursimi i TVSH që merret nga eksportuesit, që jepet me një afat 30 ditor, do jepet me një afat shumë më të shkurtër brenda 3 ditëve nga paraqitja e kërkesës, për ata që eksportojnë më shumë se 70% të qarkullimit dhe prodhimit të tyre. Kemi vendosur krijimin e një grupi pune të përbashkët mes Ministrisë, BSH, shoqatës së bankave dhe shoqatave të eksportuesve, kryerjen e parashikimeve të përbashkëta për efektin që një zhvlerësim i euros më tej do të kishte dhe marrjen e masave”, tha Ibrahimaj.
p.k\dita