Qytetarëve të Ballkanit Perëndimor do ju nevojitet vetëm një kartë identiteti për të lëvizur në Shqipëri. Lajmin e ka bërë të ditur ministri i Brendshëm, Bledi Çuçi, pas mbledhjes së Këshillit të Ministrave.
“Lëvizje e lirë të shtetasve në Ballkan vetëm me dokument identiteti. Qeveria shqiptare e miraton. Me hyrjen në fuqi, të gjithë shtetasit e BP-së mund të qarkullojnë lirshëm në Shqipëri vetëm më kartë identiteti”, tha ministri.
Ai shtoi se një vendim tjetër i miratuar dje në mbledhjen e Qeverisë, ka qenë Plani i Veprimit për luftën kundër krimit të organizuar dhe krimeve të rënda për vitet 2023-2025
“Nga të rejat, në Planin e Veprimit mund të veçoja krijimin e Agjencisë për Rikuperimin e Aseteve apo për trajnimin në mënyrë të gjerë në fushën kibernetike”, deklaroi ministri.
Çfarë parashikon marrëveshja
Marrëveshja për lëvizjen e lirë në vendet e Ballkanit Perëndimor parashikon lëvizjen e lirë me karta identiteti të personave, njohjen e diplomave universitare dhe njohjen e kualifikimeve për tre profesione: mjekët, dentistët dhe arkitektët.
Marrëveshj është nënshkruar më 3 nëntor. Janë katër marrëveshje, për të cilat liderët e shteteve të Ballkanit Perëndimor kanë rënë fillimisht në samitin e Sofjes, në nëntor të vitit 2020, asokohe nën ish-Kancelaren Merkel. Deri tani vetëm Shqipëria, ka ndërmarrë hapa të mëtejshëm institucionalë.
j.l./ dita
