Licencohen 300 punonjësit e parë sociale. Në një aktivitet të zhvilluar në kudër të “Ditës Botërore të Punës Sociale”, ministrja e Shëndetësisë, Ogerta Manastirliu, së bashku me përfaqësuesin e UNICEF në vendin tonë, Dr.Roberto Bernardi, kreun Urdhrit të Punonjësit Socialë, Mirgit Vataj, kanë shpërndarë certifikatat e para të licencimit për këta profesionistë të shëndetit.
Në fjalën e saj, ministrja Manastirliu nënvizoi fuqizimin e rolit të punonjësit socialë në protokollet e shërbimit spitalor, por edhe në shërbimin parësor me krijimin e qendrave socio-shëndetësore.
“Vëmendja jonë është në fuqizimin e rolit të punonjësit socialë, në zgjerimin e bazës së shërbimeve ku punonjësi socialë të jetë pjesë integrale. Strategjia jonë e kujdesit parësor përmban pikërisht një komponent kyç që ka të bëjë me komponentin socio-shëndetësor, integrimin e shërbimeve që ofrohen në shëndetësi, ku një rol me të rëndësishëm ka figura e punonjësit socialë dhe psikologut brenda kujdesit parësor. 50 punonjësit socialë dhe psikologët e parë tashmë janë atashur pranë qendrave shëndetësore dhe brenda këtij viti, ne do të kemi edhe 50 punonjës të tjerë, psikologë dhe punonjës socialë, të cilët do të atashohen në strukturat e kujdesit parësor në të gjithë Shqipërinë”, vuri në dukje ministrja Manastirliu.
Punonjësit Social janë përfshirë edhe në reformën për vlerësimin e individëve më aftësi të kufizuara, si anëtarë në komisionet bio-psiko-sociale dhe pjesë e vlerësimit multidisiplinar. Aktualisht, janë 21 punonjës socialë pjesë e këtyre Komisioneve të ngritura në 12 Qarqet e vendit. Gjithashtu punonjësit socialë janë pjesë e strukturave shëndetësore, sociale, arsimore, të drejtësisë, etj.
p.k\dita
