Seanca e parashikuar për këtë të mërkurë në Gjykatën Kushtetuese, lidhur me ligjin e Akademisë së Shkencave, nuk u zhvillua për shkak të mungesës së njërit prej gjyqtarëve.
Përfaqësuesit e Partisë Demokratike ishin të pranishëm në seancën ku do shqyrtohej ligji që rregullon funksionimin e Akademisë së Shkencave. Pas dështimit të sotëm u vendos që seanca e radhës të zhvillohet më 28 janar, në orën 10:00.
Kujtojmë që PD, kërkon që ligji “Për Akademinë e Shkencave”, të shfuqizohet, si i papajtueshëm me Kushtetutën.
Pas seancës foli ligjvënësja demokrate, Ina Zhupa, iniciuesja kryesore e padisë në Kushtetuese të këtij ligji e cila tha se ai është miratuar në shkelje të plotë të procedurave parlamentare, duke anashkaluar pushtetin legjislativ dhe Kushtetutën e vendit.
“Pasi u sistemuam në sallë, na u njoftua se një gjyqtar ishte i sëmurë, por nuk u tha se cili. Na u duk e çuditshme që një njoftim i tillë nuk ishte bërë më herët, as në mëngjes, as një ditë më parë. Duket sikur Gjykata Kushtetuese po funksiononte si një institucion i sëmurë. Ne ishim përgatitur për të paraqitur parashtresat tona me dokumentet dhe e-mailet zyrtare. Ligji për Akademinë e Shkencave është antikushtetues, sepse e shkel thelbësisht Kushtetutën. Procedurat e miratimit të këtij ligji janë zhvilluar në shkelje të rregullores dhe pa firmat e relatorëve, prandaj janë nul. Ne do të vazhdojmë të mbrojmë pavarësinë e institucioneve në Shqipëri, të cilat po përpiqen të kapen nga kryeministri Edi Rama”, tha Zhupa.
Sipas Zhupës, gjthashtu ligji “Për Akademinë e Shkencave”, nuk respekton akademikët sepse nuk garanton barazinë e tyre para ligjit.
j.l./ dita
