Nga kryesia e Kuvendit këtë të premte, deputetja e Partisë Socialiste Iris Luarasi, në një deklaratë për mediat, foli për barazinë gjinore, projektligj i cili u miratua ditën e enjte nga Parlamenti Shqiptar.
Sipas Luarasit, është pretenduar se ligji kërcënon familjet shqiptare dhe shton numrin e gjinive, por ajo e ka konsideruar këtë si gënjeshtër të qëllimshme dhe e hodhi poshtë.
“Në realitet, ky ligj nuk shton asnjë realitet të ri ligjor. Ai nuk krijon kurrsesi gjini të reja, vetëm synon të garantojë barazi reale midis dy gjinive që janë burrë dhe grua. Është pretenduar se ligji kërcënon familjen tradicionale dhe shton numrin e gjinive. Le të jemi të qartë: narrativa që ‘po legalizohen 70 gjini në Shqipëri’ është një gënjeshtër e qëllimshme, e përsëritur aq shumë sa disa filluan ta besonin. Ligji nuk krijon kurrësesi gjini të reja, vetëm synon të garantojë barazi reale midis dy gjinive që janë burrë dhe grua.
Kemi dëgjuar gjatë kësaj periudhe se projektligji detyron përdorimin e ‘gjuhës gjithëpërfshirëse gjinore’, duke zëvendësuar termat ‘nënë’ dhe ‘baba’ me shprehje neutrale si ‘prind 1’ dhe ‘prind 2’. As unë dhe as kolegët e mi të Partisë Socialiste nuk do votonim kurrë për një ligj që nuk do na jepte mundësinë që fëmijët mos na thërrasin nënë dhe baba, dhe termat prind 1 dhe prind 2 në ligj janë vetëm një gënjeshtër e shpikur nga ata që nuk e kanë lexuar projektligjin, por besojnë çdo gjë që lexojnë në rrjetet sociale.
Në projektligj nuk përdoret termi ‘gjuhë gjithëpërfshirëse gjinore’, por flitet për gjuhë me ndjeshmëri gjinore, e cila nuk përfaqëson asgjë më tepër sesa korrektësi gramatikore në terma, që kolegët e mi në vendimmarrje mos të nënshkruajnë me termin Ministër, por të nënshkruajnë me termin Ministre. Mos të përdorim termin drejtor, por drejtore kur drejtuesja e institucionit është një grua, e kështu me radhë”, është shprehur Luarasi.
j.l./ dita
