Xhevit Sinani, 80-vjeçari i arrestuar për vrasjen e gruas dhe të vëllait të tij është lënë në masën e sigurisë ‘arrest me burg’.
Para trupit gjykues, Sinani ka mohuar që të ketë pasur gisht në krim, por që i ka gjetur të dy të vdekur dhe u ka mbuluar trupin.
Sinani tha se kishte qenë në banesën e të vëllait dhe e kishte parë këtë të fundit përtokë të vdekur. Më pas kur kishte shkuar në banesën e tij ku kishte parë të pajetë bashkëshorten e tij.
“Vëllai kishte përdorur një ilaç në vesh, më pas kishte dalë në oborr dhe ishte rrezuar, ishte vrarë. E mbulova vëllanë dhe ika te gruaja. Edhe gruaja ishte e vrarë. Jo, s’kam vrarë njeri. Vetëm u mbulova trupat”, ka thënë 80-vjeçari kur është pyetur.
Avokati i 80-vjeçarit, i caktuar nga gjykata tha se i moshuari ka probleme të qarta të shëndetit mendor dhe do t’i nënshtrohet vizitave mjekësore. Ngjarja ndodhi pasditen e së premtes në fshatin Tërvol të Gramshit.
80-vjeçari vrau me sëpatë bashkëshorten e tij Zegjine Sinani dhe vëllanë Shaqir Sinani. Fqinjët folën për probleme të shëndetit mendor të Sinanit dhe për xhelozinë që ndjente ai ndaj bashkëshortes.
j.l./ dita
