E ftuar në emisionin e mëngjesit “Rreze Dielli” në Report TV, me moderatore Androniki Kolka, ishte Lira Gjika, pediatre e njohur e cila dha disa këshilla për fëmijët që shkojnë në kopshte dhe klasa të para.
”Prindërit duhet të stërvisin durimin, pasi fëmijët janë shumë më të vëmendshëm për çdo gjë dhe kanë një memorie për t’u admiruar” tha ajo, duke shtuar se prindërit duhet të mahniten me gjetjet e fëmijëve të tyre, duke i lënë që të zhvillohen dhe të krijojnë.
”Shumë prindër nuk i qëndrojnë “lojës së habisë” kur fëmija i tyre u tregon për diçka që ata kanë zbuluar, por e neglizhojnë, ku në fakt mund të ndikojnë në rritjen e vetëvlerësimit të tyre” shtoi pediatrja e njohur.
”Çdo zbulim që fëmijët bëjnë, është më i madh se zbulimi i Ajnshtajn me teorinë e relativitetit, pasi psiqika e tyre është shumë më shumë sesa mendojmë ne” theksoi ajo.
Sipas Lirës, fëmijët duhet të shkojnë në kopshte për dy arsye kryesore, së pari për të zhvilluar fjalën dhe së dyti për të ndërtuar marrëdhënie me fëmijët e tjerë. ”Kur një fëmijë shkon për herë të parë në kopsht, duhet që prindi t’i flasë, pasi ai në ato momente mendon se mos e kanë braktisur dhe neglizhuar, por një komunikim i mirë, e shuan dhe këtë problem” nënvizoi ajo, duke theksuar se kopshtet, familja janë vendet ku mësohet dashuria për tjetrin.
Këshillat e pediatres ishin dhe për prindërit që dërgojnë për herë të parë fëmijët në klasa të para. ”Si fillim duhet që prindërit të flasin më fëmijët për shkollat, që në kopsht, më pas kur të nisi shkolla, fëmijët të qëndrojnë gradualisht në shkollë duke nisur nga 20 minuta në ditë” tha Lira.
Një pikë tjetër e rëndësishme është dhe komunikimi që kanë mësuesit, pasi fjala është ajo që fëmijët fokusohen, veçanërisht kur flet një i rritur.
”Kohët e fundit po shoh gjithmonë e më shumë baballarë të përfshirë me fëmijët dhe kjo është diçka që më pëlqën” u shpreh Lira Gjika, duke mos harruar të përmendë faktin se në një shtëpi fëmija ka nevojë për dy duar, babain dhe nënën që janë hallka të pazëvendësueshme.
