Ministri i Financave, Petrit Malaj, deklaroi sot se procesi për hapjen e basteve sportive online është në fazën përfundimtare, me vetëm dy akte nënligjore që mbeten për t’u miratuar para nisjes së aktivitetit të ligjshëm të operatorëve.
Në një konferencë për shtyp, Malaj tha se këto akte po bashkërendohen me Ministrinë e Drejtësisë dhe, pas dakordësimit final, do të publikohen për të hapur rrugën e licencimit të operatorëve.
“Për sa i përket basteve sportive online, kanë mbetur edhe dy akte nënligjore që po i bashkërendojmë me Ministrinë e Drejtësisë. Pas përfundimit të këtij procesi, do t’i publikojmë për të vijuar me licencimin e operatorëve”, u shpreh ministri.
I pyetur edhe për ecurinë e nismës së “paqes fiskale”, Malaj theksoi se procesi varet nga miratimi i akteve nënligjore dhe pritet të hyjnë në fuqi brenda muajit maj.
Sipas tij, zbatimi mund të ndodhë në pjesën e parë ose të dytë të muajit, ndërsa çdo ndryshim i afateve do të varet nga ecuria e miratimeve dhe, nëse nevojitet, do të shoqërohet me ndërhyrje ligjore.
“Sa i përket akteve nënligjore për fshirjen e detyrimeve doganore dhe tatimore dhe paqes fiskale, ato pritet të hyjnë në fuqi brenda muajit maj. Në varësi të ecurisë së procesit, do të vendoset nëse do të ketë shtyrje apo jo”, tha Malaj.
j.l./ dita
