Marrëveshja për emigrantët ka shkaktuar kaos dhe tensione në mbledhjen e Komisionit Parlamentar të Sigurisë. Deputetët e opozitës nuk lejuan zhvillimin normal të punimeve të Komisionit, duke bllokuar kështu mbledhjen.
Në kushtet e goditjes së tavolinave nga ana e deputetëve të grupimit të ish-kryeministrit Sali Berisha, deputetët e mazhorancës kanë vendosur që zhvillimi i mbledhjes të bëhet online.
Ndërkohë që kryetari i komisionit, Nasip Naço qëndronte në këmbë, në vend të tij ishte ulur deputeti demokrat, Flamur Noka, i cili theksoi se marrëveshja e parë që duhet të kalojë është ajo për të respektuar Kushtetutën.
Marrëveshja për emigrantët mes Italisë dhe Shqipërisë do të votohet në seancë plenare të datës 21 dhjetor që është edhe seanca e fundit për vitin 2023.
Në nenin 3 të protokollit të datës 6 nëntor thuhet se pala shqiptare i njeh palës italiane të drejtën për përdorimin e zonave, sipas kushteve të përcaktuara në këtë protokoll dhe se zonat jepen pa kundërshpërblim për të gjithë kohëzgjatjen e këtij protokolli.
Në nenin 4 përcaktohet se palët bien dakord se numri i përgjithshëm i migrantëve të pranishëm njëkohësisht në territorin shqiptar, në zbatim të këtij protokolli, nuk mund të jetë më i lartë se tre mijë veta.
Sipas marrëveshjes hyrja e migrantëve në ujërat territoriale dhe në territorin e Republikës së Shqipërisë do të kryhet ekskluzivisht me mjetet e autoriteteve kompetente italiane.
Në momentin e mbërritjes në territorin shqiptar, autoritetet kompetente të secilës prej palëve do të vijojnë veçmas me përmbushjen e kritereve të parashikuara nga dispozitat ligjore kombëtare përkatëse, si edhe duke iu përmbajtur kushteve të këtij protokolli.
p.k\dita
