Ekipi i Vllaznisë tashmë ka hyrë në javën e fundit të përgatitjeve para ndeshjeve të “Conference League”, ku shkodranët do jenë përballë Daugavpils të Letonisë në datat 10 dhe 17 korrik.
Kështu, kuqeblutë duket se tashmë kanë “vënë pikat mbi i” përsa i përket kolaudimit të formacionit dhe në duelin ndaj letonezëve pritet të ketë pak dyshime për ata që do të zbresin në fushë nga minuta e parë. Në portë duket se momentalisht ka më shumë konkurrencë se në repartet e tjera.
Ku si Qarri ashtu edhe Jukaj duken të barabartë në vlera dhe kanë po ashtu të njëjtin besim nga ana e stafit. Megjithatë, duket se momentalisht është Qarri, portieri të cilit do t’i besohet katërkëndori në sfidat europiane. Në mbrojtjen me 3, tashmë treshja Jazxhi-Kuros dhe Bajrami duket se janë në “pole” për një fanellë titullari. Dhe pavarësisht afrimit të Gjinit në javën e fundit, vështirë duket që shkodrani të jetë një titullar në “Conference League”. Teksa një opsion për mbrojtjen me 3 është edhe Gurishta, i cili do të “lironte” djathtas pozicionin për Krujën e teksa në stol pastaj do të përfundonte Bajrami.
Në të majtë të mesfushës pritet Jago, me Hakajn, i cili ende nuk është në formën e tij më optimale fizike. Teksa mesfusha po ashtu do kompletohej edhe nga 3 futbollistë si: Krymi, Qato dhe Mala. Me këtë të fundit që do të ketë një rol disi më të avancuar në fushë për të mbështetur dyshen sulmuese që pritet të formohet nga Balaj dhe Dodaj.
E tashmë me largimin e Grudës duket se ka vend shumë pak për dyshime për sa i përket repartit të sulmit te Vllaznia. Teksa shkodranët po përgatisin plot seriozitet duelin e parë kundër Daugavpils, ku objektivi ngelet kalimi i turit të parë në “Conference League”.
