Në rastet kur mësuesi i lëndës do të mungojë për arsye të ndryshme, nxënësit nuk do të bëjnë me orë pushimi, sikundër ka ndodhur deri më tani. Një ndër ndryshimet e rëndësishme të bëra në ligjin për arsimin parauniversitar, është edhe rikthimi i mësuesve në dispozicion, të cilët do të mbulojnë mungesat që raportohen çdo ditë nga shkollat e arsimit të detyruar 9-vjeçar, apo edhe shkollat e mesme në të gjithë vendin. Për të plotësuar këto mungesa në kohë, është vendosur që në çdo zyrë vendore arsimore të secilës bashki të vendit, të ngrihet dhe të funksionojë struktura e re e mësuesve në dispozicion.
Sipas autoriteteve të Ministrisë së Arsimit dhe të Sportit, kjo ka qenë një përvojë e para shumë viteve që duhej të rikthehej. Kjo pasi, procedurat që janë zhvilluar deri më tani nëpërmjet portalin online të punësimit marrin shumë kohë, duke bërë që plotësimi i orëve të munguara të bëhet më vonesë. Si rezultat i këtyre procedurave në shumë raste, mungesat janë zhvilluar si orë pushimi.
“E kemi parë shumë të nevojshme sepse në shumë raste, kur një mësues mungon, procedurat që zhvillohen nëpërmjet portalit Mësues për Shqipërinë, marrin kohë. Dhe nxënësit dhe shkollat janë të detyruar të bëjnë orë pushim deri sa të vijë mësuesi zëvendësues”, ka bërë me dije ministrja e Arsimit dhe Sportit, Evis Kushi në lidhje me ndryshimet e bëra në ligjin për arsimin parauniversitar për rikthimin e mësuesve të dispozicionit.
Kështu në çdo njësi do të ketë një strukturë të mësuesve në dispozicion që do të jenë me kontratë të përhershme (jo të përkohshme), të cilët do të jenë gjithmonë aty në bazë të nevojave ku ka mungesa të mësuesve për arsye të ndryshme. Por, edhe në këtë rast punësimi i tyre do të bëhet nëpërmjet portalit online “Mësues për Shqipërinë”. Çka do të thotë se këta mësues që do jenë pjesë e kësaj strukture do të jenë gjithmonë aty, dhe nxënësit nuk do të bëjnë më asnjë orë pushim, por gjithmonë për çdo nevojë që kanë shkolla do të jenë mësuesit nga kjo strukturë që do të mbulojnë mungesat e arsimtarëve të tjerë.
Lidhur me rishikimet e bëra në ligjin e arsimit parauniversitar, ministrja e Arsimit dhe Sportit, Evis Kushi, ka deklaruar më herët se të gjitha këto ndryshime janë konsultuar në një proces shumë të gjerë për shumë muaj me ekspertë të fushës. “Kemi patur dakordësinë e të gjithë aktorëve. Së shpejti ligji do të shkojë në Kuvendin e Shqipërisë ku dhe do të shqyrtohet. Dhe shpresoj që edhe atje do të kemi dakordësisë për t’i bërë sa më shpejt realitet këto ndryshime”, nënvizoi Kushi.
p.kola
