Mbërrin në atdhe trupi i Prof. Isuf Kalo. Për të nderuar emrin dhe kontributin e tij të vyer shkencor, në Akademinë e Shkencave do të bëhen homazhe sot, ditën e Premte në orën 10.00 deri 13.00.
Fjala e përcjelljes do të mbahet nga anëtari i Akademisë Prof. Anesti Kondili në orën 11.00.
Isuf Kalo do të prehet në Luzat të Tepelenës të shtunën në orën 12.00
Profesor Kalo, u nda nga jeta disa ditë më parë në Kopenhagen të Danimarkës.
Mjeku i njohur lindi në 1942 në Luzat të Tepelenës. Ai u diplomua për Mjekësi në Universitetin e Tiranës në 1964.
Profesor Kalo është specializuar për Diabetologji dhe Endokrinologji në disa vende të Europës. Ai ishte një nga pionierët e këtyre fushave në Shqipëri.
Për disa vjet ai ishte kreu i Endokrinologjisë në Fakultetin e Mjekësisë dhe Qendrën Spitalore Universitare të Tiranës.
Mbante gradën Doktor në Shkencat Mjekësore.
Deri në vitin 1985, doktor Kalo ishte mjeku personal i Enver Hoxhës.
Nga viti 1991 deri në 2004 ai punoi në Organizatën Botërore të Shëndetësisë në Zyrën Rajonale për Europën në Kopenhagen, ku drejtoi Programin Europian për Diabetin dhe më vonë Programin për Cilësinë e Sistemit Shëndetësor, në Europë.
Dr. Kalo është autor i shumë studimeve të publikuara në revistat e profilizuara mjekësore ai dhe anëtar nderi i disa bordeve ndërkombëtare të shoqatave mjekësore në Europë.
DITA
