Shifrat me të cilat po rritet sëmundja e diabetit dhe komplikacionet që shkakton ajo, kërkojnë një plan kombëtar për të parandaluar jo vetëm diabetin por edhe komplikacionit që shkakton, të cilat janë që nga humbja e shikimit deri te humbja e njërës gjymtyrë.
Diabeti çon çdo vit në verbimin e 1.000 pacientëve, ndërkohë që jo pak humbin njërën këmbë, pasi këmba diabetike është ndër komplikacionet e rëndësishme tek këta pacientë.
“Në vitin 2005 ishin 30 mijë pacientë, sot jemi 86 mijë, gati trefish të numrit të personave me diabet. Ka një rritje të lehtë të verbimit dhe këmbës diabetike”, shprehet Florian Toti, mjek endokrinolog.
Shumëfishimi i numrit të pacientëve me diabet lidhet me ushqimet qe po konsumojnë shqiptarët sot. Pjesa më e madhe e produkteve që shiten në markete stimulohen me hormone duke nisur që nga mishi, bulmeti, (përdorimi masiv në produkte i qumështit pluhur dhe niseshtesë).
Këshillohen masivisht frutat në vend të sheqerit të shtuar në produkte, si edhe perimet. Por edhe këto duhen zgjedhur me kujdes të jenë sezonale dhe produkte të pandikuara nga hormonet. Kush ka mundësi të sigurojë produkte fshati të rritura vetë, është me fat.
Mjekët thonë se edhe mungesa e aktivitetit fizik është ndër shkaqet kryesore, pasi ne përdorim makinën edhe për distanca të shkurtra.
Kërkohet në mënyrë imediate parandalimi që në fëmijëri, shteti duke rritur kontrollet ushqimore, individi duke rritur vigjilencën dhe kujdesin në rregjimin ushqimor dhe stilin e jetesës.
Sëmundja e diabetit është ndër më të kushtueshmet si për familjen që ka një pjesëtar me diabet, por edhe për buxhetin e shtetit në shëndetësinë publike.
j.l./ dita