Për të shmangur mbingarkesën në QSUT, trajtimi për urgjencat pediatrike do të bëhet fillimisht pranë qendrave shëndetësore, ku katër prej tyre do të jenë të hapura gjatë 24 orëve, në çdo ditë të javës.
Mjeku pediatër do të përcaktojë më tej, nëse do jetë i nevojshëm kujdesi më i specializuar pranë Shërbimit të Pediatrisë në Qendrën Spitalore Universitare “Nënë Tereza”.
Lajmin për ofrimin e shërbimeve të urgjencës pediatrike edhe në nivelin parësor përgjatë këtij muaji e ka bërë me dije vetë ministrja e Shëndetësisë, Albana Koçiu, e cila ka konfirmuar edhe se cilat do të jenë këto qendra.
“Prindër të dashur, për të lehtësuar fluksin e shtuar dhe reduktuar kohën e pritjes në urgjencën e Spitalit Pediatrik pranë QSUT, gjatë ditëve të fundit, e sidomos gjatë fundjavës e orareve të natës, si pasojë e rritjes së numrit të të vegjëlve të prekur nga virozat e stinës, kemi marrë të gjitha masat që 4 Qendra Shëndetësore në Tiranë të jenë në shërbimin tuaj 24/7, pra edhe gjatë fundjavës, për urgjencat pediatrike”, shkruan ministrja Koçiu.
Shërbimi 24/7 për fëmijët do të ofrohet në:
- Qendrën shëndetësore nr. 10 në zonën e Oxhakut.
- Qendrën shëndetësore nr. 8 në sheshin Ëilson pranë ish-Bllokut.
- Qendrën shëndetësore nr. 7 në Laprakë.
- Qendrën shëndetësore nr. 6 Kombinat.
Me nisjen e muajit dhjetor bëhet e ditur se virozat dhe gjendjet gripale janë shtuar së tepërmi, ku moshat pediatrike rezultojnë të jenë edhe më të prekurit. Fluksi i pacientëve të vegjël që kanë shfaqur nevojë për ndihmë të specializuar mjekësore është në rritje, çka ka mbingarkuar urgjencën dhe shërbimin pediatrik në Qendrën Spitalore Universitare “Nënë Tereza”. Si shkak i kësaj mbingarkese, prindërve u është dashur të qëndrojnë në radhë edhe disa orë deri në marrjen e shërbimit të duhur për fëmijën e tyre.
p.k\dita
