AktualitetPolitike

Mbyllet orari zyrtar i votimit, në disa qendra vijon ende procesi, KQZ pritet me deklaratë

Në orën 19:00 ka përfunduar zyrtarisht afati i votimit për kryebashkiakët dhe këshillat bashkiakë, që do të drejtojnë 61 bashkitë për katër vitet e ardhshme. Votimi përtej orarit zyrtar vijon vetëm aty ku ka ende votues. Raportohet se pjesa më e  madhe e qendrave tashmë janë mbyllur, sidomos ato në zonat rurale, teksa komisionerët po përgatisin procesverbalet dhe dorëzojnë kutitë. Vetëm në disa prej qendrave të qyteteve raportohet se ka zgjatje të procesit të votimit. KQZ pritet të dalë me njoftim për mbylljen e procesit.

Prej orës 07:00 të mëngjesit deri në 19:00, qytetarët i janë drejtuar kutive të votimit për të hedhur votën për 61 kryetar bashkie dhe këshilla bashkiakë. Procesi i votimit për zgjedhjet lokale në të gjithë vendin ishte i qetë pa incidente serioze. Pjesëmarrja e votuesve është e ulët dhe kjo nisi që në mëngjes pasi procesi nisi me një problem serioz në funksionimin e pajisjeve të identifikimit elektronik. E gjitha solli ikje të njerëzve që ishin në qendrat e votimit për të votuar. Problemi u zgjidh me urdhër të KQZ që njoftoi se procesi duhet të vijojë manualisht, që do të thotë se zgjedhësit do të identifikohen me anë të listave të printuara.

Shpërndaje këtë artikull