Ish-shefi i OLAF (Zyra Evropiane Kundër Mashtrimit), Giovanni Kessler u dënua javën e shkuar nga një gjykatë belge me një vit burg me kusht. Ai u gjet fajtor për praktika të paligjshme hetimi.
Gjykata belge dënoi Kessler për akuzat se përgjoi jashtë procedure një komisioner Europian si pjesë të një hetimi. Bëhet fjalë për John Dalli, i cili ishte komisioneri i shëndetësisë i BE-së.
Dalli dha dorëheqjen në tetor 2012 mes akuzave se ndihmësi i tij i lartë kishte kërkuar ryshfet nga industria e duhanit.
Dalli ka shpallur me zë të lartë pafajësinë e tij dhe Kessler tha se ka në plan të apelojë vendimin.
“Unë kam vepruar gjithmonë në mënyrë transparente dhe me qëllimin për të gjetur të vërtetën mbi akuzën, e cila ishte një akuzë shumë serioze”, tha Kessler për POLITICO.
Pas vitesh vonese, Komisioni Evropian ra dakord në vitin 2016 për të hequr imunitetin e Kessler. Kjo i hapi rrugën prokurorëve belgë për ta marrë në pyetje lidhur me pretendimet se ai regjistroi në mënyrë të fshehtë dëshmitarët e çështjes, një krim sipas ligjit belg.
Kessler, nga partia e Federica Mogherinit dhe i afërt me të, është dhe hetuesi që mbylli hetimet për akuzat e hershme në blerjen e një vile për rezidencë të ish-ambasadores së Bashkimit Europian në Tiranë.
Vila në fjalë ndodhet në Lundër pranë Tiranës dhe u ble nga BE me trefishin e çmimit të tregut, sipas akuzave.
Asokohe shefja e Delegacionit europian në Tiranë Romana Vlahutin u akuzua se kishte shkelur procedurat dhe kishte abuzuar me detyrën.
Eurodeputetë si Ingeborg Graessle, kryetare e komisionit buxhetor, e quajtën “Skandal shokues me pasoja për besueshmërinë e BE” dhe kërkuan informacione me shkrim. Më vonë kjo dosje u arkivua nga Kessler.
Vlahutin i shpëtoi hetimit penal, por u shkarkua nga Komisioni Europian në fillim të vitit 2023 për shkelje të ndryshme.
