Kryeministri Edi Rama tha se opozita ka shpërthyer një “kanal ujërash të zeza” në lidhje me çështjen e agjentit të arrestuar të FBI, Charles McGonigal.
Në nisje të fjalës së tij për interpelancën me opozitën, Rama tha se ndaj tij nuk ka asnjë fakt, akuzë apo përfshirje përtej asaj që lexohet në materialin e publikuar tashmë nga FBI.
Kryeministri tha se nuk do të përballet më me opozitën në një luftë që sipas tij është e kotë.
Pjesë nga interpelanca:
Edi Rama: Ka shpërthyer prej javësh një kanal ujërash të zeza në një çështje që nuk ka lidhje fare me Shqipërinë. Charles McGonigal akuzohet për bashkëpunim me oligarkun Oleg Deripaska. Prokurorët kanë konstatuar edhe një sërë shkeljesh për udhëtimet e tij, ku aktakuza shënon që ka vizituar Shqipërinë dhe është takuar me mua. Aktakuza shënon se ka ardhur në rajon dhe nuk ka deklaruar. Procesi nuk ka asnjë të pandehur. Pavarësisht një hetimi të gjatë, edhe kur janë pyetur nga një gazetar amerikan i “Insider” në të gjitha rreshtat e akt-akuzës nuk ka asnjë akuzë apo informacion tjetër. Fakti i vërtetë është se ai ka folur me mua për rrezikun rus, por fronti këtu po zhvillon me hov në pazar një tjetër proces gjyqësor, përmbarimor në Shqipëri. Kush janë dhe pse e bëjnë, kjo dihet. Nuk i ngatërron dot me dikë tjetër se as nuk bëhen dot dikush tjetër. Janë po ata, që kur ishin në pushtet i kanë bërë të gjitha të zezat për të cilat na akuzojnë. Unë nuk kam ardhur dhe nuk do të vij më për ta. Do të vij për respekt të ndjekësve që përfaqësoj dhe për respekt të deputetëve në këtë mocion absurd për debat. Ky është mocioni më absurd i debatit në këtë Kuvend. Edhe prodhuesit e filmave në Hollywood do e refuzonin këtë si shfryrje. Nuk do ta furnizoj më me energjinë time zjarrin e përplasjes pa ndalim. Nuk kam dëshirë të armatosem me fjalorin e ulët të kësaj lufte politike, të një opozite që përsërit vetveten.
Edi Paloka: Jep ore përgjigje
Edi Rama: Jam përfshirë pa dashje në këtë luftë, në këtë mase të errët duke bërë që njerëzit të mendojnë se jemi një jashtëqitje e madhe e kombit e ndarë në gjysmë. Mjaft më, ka kaq shumë për të bërë jashtë këtij qerthulli. Shani, shpifni, protestoni sa të doni, por nderin e përballljes me mua duke rrokanisur konkën e miletit s’keni për ta patur më. Po të doni mos u shkulni më kurrë, por s’do me këni më palë.
Më 14 maj ku përveç Tiranës, Durrësit dhe Elbasanit që siç na keni informuar i keni në xhep do merrni edhe Vlorën edhe Uashingtonin. Unë ju hap rrugë përfundimisht. Sot dua ta them që ndihem fajtor, madje shumë fajtor që nuk kam bërë dot atë që duhet kundër mjerimit të thellë të politikës në këtë arenën tonë, ku gëlon, shejtan-budallallëku, harbutllëku, gomarllëku, pisllëku. Ku fukarallëku i vlerave, i aspiratave dhe qëllimeve që ulet ne mexhlisin e jetës publike shqiptare, foltore më foltore dhe kanal me kanal, e ka molepsur shoqërinë, duke ushqyer nihilizmin, egoizmin dhe indiferentizmin të më shumë individëve.
Kjo nuk është politika, por versioni më i saj më i degraduar, më vulgar. Politika është diçka tjetër, e lartë dhe e dobishme, për njerëzit dhe me njerëzit, për të bërë me të tjerë ndryshime që njeriu i vetëm nuk i bën dot vetëm.
j.l./ dita