Nga Dori Xhima
Të pretendosh se po merr një udhëtar të zakonshëm në rrugë sepse je “njeri besimtar”, por në fakt po transporton një nga personat më të kërkuar nga SPAK-u, është një histori që vështirë se mund t’i rezistojë provave të drejtësisë.
Ish-zyrtari i lartë i Policisë së Shtetit, Uljan Shpataraku, tentoi t’u shiste hetuesve një version gati “fëmijëror” të ngjarjes, por xhirimet nga ajri të policisë e kapën atë mat duke zbuluar të vërtetën.
I marrë në pyetje pas arrestimit gjatë operacionit ku ra në pranga personi i kërkuar prej 8 muajsh, Ergys Agasi, Shpataraku deklaroi se nuk e njihte personin që kishte marrë në makinë.
”Më tha se quhej Berti. Nuk e njoha që ishte Ergys Agasi. E mora në rrugë se më bëri ‘autostop’. Unë i marr njerëzit në rrugë sepse jam besimtar dhe nuk kam frikë,” – mësohet të ketë thënë ish-efektivi, i njohur për afrinë me ish-drejtorin e përgjithshëm, Ilir Proda.
Për të arsyetuar praninë e tij në mjetin luksoz, ai shtoi se makinën ia kishte marrë huaj një shoku (me emrin “Tomi”), sepse makina e tij personale “nxehej”. Ai pretendonte se kishte ecur pa ndalur me destinacion direkt Elbasanin.
Oksigjeni i gënjeshtrës mbaron në ajër: Droni zbardh lëvizjet reale
Të gjitha këto pretendime u rrëzuan brenda pak orësh nga pamjet filmike të dokumentuara me dron nga forcat e policisë, të cilat e kishin vënë mjetin nën vëzhgim hap pas hapi.
Sipas dosjes hetimore dhe pamjeve të siguruara nuk pati asnjë “autostop” në rrugë. Droni e filmoi automjetin Audi A6 duke hyrë dhe marrë Ergys Agasin direkt nga vila e “Visit të Pojës” në zonën e komplekseve rezidenciale.
Është kryer ndjekje për rreth 40 km. Policia dokumentoi me video dhe foto çdo lëvizje të mjetit gjatë rrugës nga Durrësi, në rrethrrotullimin e Bradasheshit e deri në zonën e Plepave ku u bë edhe bllokimi përfundimtar i tij.
Gjatë kontrollit të mjetit, përveç prangosjes së të dyve, policia sekuestroi sende me vlerë marramendëse, përfshirë një orë luksoze të markës “Richard Mille”, çantë luksoze “Hermès”, 4 telefonë iPhone si dhe një çantë me euro.
Gjykata e Posaçme (GJKKO) rrëzoi pretendimet e Shpatarakut dhe vendosi masën e sigurisë “Arrest në burg” për ish-zyrtarin e policisë, nën akuzën e përkrahjes së autorit të krimit.
DITA
