Nga Fatos Tarifa
Botuar në DITA
Kur flet ai, e tërë Europa dëgjon! Ketë thuajse tha Berisha pasi u kthye në shtëpi nga turi i tij historik. Unë dyshoj se, në fakt, kur flet ai, Europa zë hundët me duar.
Krenar, por, si gjithnjë, mender i dh..er, ai u tha atyre pak gazetarëve, që mezi kishin pritur t’u kthehej “ylli” i tyre dhe u mblodhën pa humbur kohë ta dëgjojnë, se mediat europiane u çanë e u shqyen–dhe shtypi europian u mbush–me “artikuj dhe kryeartikuj” kushtuar atij, Berishës, zërit të së “vërtetës mbi Shqipërinë dhe shqiptarët”.
Saliu sqaroi shumë mëdyshje dhe ndriçoi shumë mendje në Bruksel e në mbarë Europën, që deri më sot Shqipërinë e kishin konsideruar një vend normal e që po bënte mjaft progres për t’u pranuar në BE.
Por, jo, u tha Berisha. Në BE duam të hyjmë, “por jo tani”! Jo tani, sepse kjo nuk është koha ime. Dhe si mund të hyjë Shqipëria në BE pa Saliun në krye të saj!
Shqipëria, u tha Saliu me mburrje e krenari europianëve (se cilëve europianë hajde merre vesh), plotëson vetëm një kriter për t’u bërë një vend anëtar i Bashkimit Europian, atë gjeostrategjik. Por “nuk plotëson asnjë kriter tjetër”, u tha ai kujtdo që në Bruksel pati kohë e durim ta dëgjonte.
Dikush nga të tijtë, nga ata të MAGA-s shqiptare, duhet ta ndihmojë e t’i thotë kreut të bajrakut të vet: “Enough is enough, kryetar”, që të mos bëhet më qesharak nga sa është bërë tërë këto kohë. Duhet shpëtur nga mankthi që e ka zënë e të kuptojë se jo në Europë apo në Bruksel, por as në fshatin e tij, andej nga ka ardhur, nuk ia var njeri.
Është ende i rrizikshëm, thonë disa. Por ligji, me të cilin po përballohet, është më i rrezikshëm se ai.
Është i keq, thonë shumë të tjerë. Thonë të vërtetën. Edhe Pont Pilati do e pranonte këtë si të vërtetë. Por, pikërisht se është i rrezikshëm dhe i keq, s’mjafton të qeshim me gjendjen e mjeruar e qesharake të tij, por t’i tregojmë vendin ku meriton të jetë–jashtë politikës e në vetmi.
Është antishqiptar, thonë një kor zërash këto ditë. Çfarëdo që të kuptojmë me këtë cilësim, Berisha nuk u bë antishqiptar sot. I tillë ka qenë ndoshta nga koha kur hyri në politikë dhe nuk prodhoi kurrë një politikë që të mos ishte e mbrapshtë e të mos e pengonte Shqipërinë të zhvillohej siç e donim të gjithë nga nëntëdhjeta e këtej.
Tani e kemi sërish peshqesh në Tiranë. I sapo kthyer nga Brukseli. I fryrë si gjel nga buja mediatike që prodhoi anë e mbarë Europës–nga Andorra në Lihtenshtajn e nga Monako në San Marino e në Vatikan (ne rend alfabetik).
Të shohim me c’mendje e me ç’enegji është kthyer këtë herë nga “Turi Europian Historik” i tij. Një gjel me kakarisje pulash, apo një pulë me pendë të rëna!
—
©️Copyright Gazeta DITA
Ky artikull është ekskluziv i Gazetës DITA, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar DITA dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
