“Më në fund një hap i rëndësishëm. Racional në çdo pikëpamje”. Kështu e cilëson akademiku dhe diplomati i njohur, profesor Fatos Tarifa, vendimin e kryeministrit Edi Rama për të propozuar reduktimin e numrit të deputetëve të Kuvendit në 101.
Një nismë që, sipas tij, ndonëse shumë e vonuar, duhet “duartrokitur dhe mbështetur”.
Në një prononcim për gazetën Dita, Tarifa thekson se zvogëlimi i trupës parlamentare është një hap pozitiv që mund të japë fryte, sidomos “nëse shoqërohet me një sistem më përfaqësues dhe më të përgjegjshëm politikisht”.
“Të shpresojmë që numri më i vogël i anëtarëve në parlament do të shoqërohet në legjislaturën e ardhshme nga një cilësi më e mirë e ligjvenësve tanë, të cilëve u kemi besuar fatet e vendit dhe mirëqenien tonë,” – deklaron Tarifa.
Me këtë propozim, mazhoranca socialiste synon jo vetëm riorganizimin e përfaqësimit, por edhe “një kurs të ri institucional” për vendin, i cili vjen paralelisht me “ndryshimet e paralajmëruara në përbërjen e kabinetit të ri qeveritar”.
Në fund të reagimit të tij, Tarifa uron sukses për përbërjen e re të Parlamentit dhe për qeverinë e re që pritet të miratohet:
“Suksese parlamentit të ri dhe qeverisë së re në veprimtarinë e tyre!”
Kjo është një ndër herët e rralla ku një figurë akademike reagon publikisht me mbështetje për një akt politik të një rëndësie të tillë strukturore.
n.s. / dita
