Shpallja e luginës Vjosa “Park Kombëtar” nga qeveria shqiptare ka bërë jehonë në të gjitha mediet ndërkombëtare. Një gjë të tillë e ka vënë në dukje edhe kryeministri Edi Rama.
Përmes një mesazhi në rrjetet sociale, Rama shkruan se jehona e Vjosës tonë “Park Kombëtar” në mediat e mëdha të botës i ka dhënë një fuqi të re imazhit ndërkombëtar të Shqipërisë.
“Jehona e Vjosës tonë “Park Kombëtar” në mediat e mëdha të botës i ka dhënë një fuqi të re imazhit ndërkombëtar të Shqipërisë, si një vend me bukurira të pafundme dhe vetëdije qeverisëse për përgjegjësinë monumentale të mbrojtjes së mjedisit në kushtet kur planeti vuan ndryshimet dramatike klimatike”- shkruan Rama, mesazh të cilin e ka shoqëruar me një zemër blu dhe një flamur të BE-së, për të nënkuptuar atë çka Vjosa përfaqëson; i vetmi lum i egër në Evropë.
Shkrimet në mediat e huaja:
“The Guardian”, e cilëson si moment historik për ruajtjen e një ekosistemi me mbi 1 000 specie, një pjesë e të cilave në rrezik zhdukje, në zemër të Evropës.
“Der Spiegel”, nënvizon se lumi i fundit i egër në Evropë kërcënohej nga ndërtimi i 46 digave. Në shkrim, saktësohet se Vjosa është bensa e mbi 1 100 specieve.
“Reuters” e cilëson një fitore të mbrojtësve të mjedisit që prej vitesh kanë luftuar përballë planeve për ndërtimin e hidrocentraleve përgjatë shtratit të lumit të fundit të egër të Evropës.
“Frankfurter allgemeine”, shprehet se rol të rëndësishëm në shpalljen e Vjosës Park Kombëtarë ka shoqëria civile. Ata shkruajnë se ky është një moment historik për Shqipërinë, sepse shumë interesa ekonomike dhe politike e kundërshtuan atë.
j.l./ dita
