Alda Klosi, ish-shefe e kabinetit në ministrinë e Rindërtimit, është marrë në pyetje ditën e sotme në ambientet e burgut 325, aty ku ndodhet që prej arrestimit.
Kjo është hera e parë që Klosi pyetet nga oficerët e policisë gjyqësore që prej momentit të arrestimit, pasi Klosi shfaqi edhe probleme kardiake dhe u shtrua disa ditë në spital.
Në dëshminë që është marrë të enjten e 16 shkurtit, Klosi i ka qëndruar pretendimeve të mëparshme se pastruesja Rozerta Dobi i ka vjedhur nga shtëpia 120 mijë eurot, ndërsa pjesa tjetër e parave që pastrueses iu gjetën në tubin e aspirimit, 500 mijë euro thotë se nuk janë të saj.
Mediat raportojnë se Klosi ka thënë para hetuesve se paratë janë të xhaxhit të saj, ndonëse bien në kontradiktë me dëshminë që i vëllai saj ka thënë në fillim se paratë ia ka marrë ai një biznesmeni.
Po gjatë ditës së sotme u mor në pyetje edhe djali i pastrueses, Havir Dobi, i cili në dëshminë e tij ka qëndruar në të njëjtën linjë me nënën. Ai thotë se të gjitha paratë i përkasin Alda Klosit dhe se nëna e tij i ka marrë ato me urdhër të saj.
Gjykata vendosi ta lërë në masën “arrest në burg” Alda Klosin deri në përfundim të hetimeve. Ndërkohë mbrojtja e Klosit i është drejtuar Gjykatës së Apelit për të ndryshuar masën e sigurisë.
m.b./dita
