Zyra e Komisionerit për të Drejtën e Informimit dhe Mbrojtjen e të Dhënave Personale, ka reaguar në lidhje me mesazhet që po u shkojnë në telefon qytetarëve nga një subjekt i caktuar politik.
Dje DITA publikoi mesazhin që Belind Këlliçi i kishte dërguar një qytetari në telefon. (Kliko)
Në deklaratën publike, zyra e Komisionerit thekson se një veprim i tillë bie ndesh me ligjin “Për mbrojtjen e të dhënave personale”.
Zyra e Komisionerit u bën thirrje subjekteve zgjedhore të përfshira të ndalojnë përpunimin e paligjshëm të të dhënave personale. Ndërkohë që theksoi se hetimet në lidhje me rastin vijojnë.
Deklarata e plotë:
Ditët e fundit është konstatuar një dërgim masiv mesazhesh të një subjekti zgjedhor në drejtim të qytetarëve nëpërmjet shërbimit të telefonisë së levizshme.
Kjo veprimtari konsiderohet përpunim i paligjshëm i të dhënave personale dhe vjen në kundërshtim me parashikimet e ligjit nr. 9887/2008 “Për mbrojtjen e të dhënave personale”.
Zyra e Komisionerit për të Drejtën e Informimit dhe Mbrojtjen e të Dhënave Personale ka vendosur në dispozicion të partive politike dhe të çdo subjekti zgjedhor, por edhe të gjithë publikut Udhëzuesin “Për përpunimin e të dhënave personale në kontekstin e fushatave zgjedhore”. Në këtë dokument shpjegohet edhe më qartë qasja në raport me përpunimin e ligjshëm të të dhënave personale.
Zyra e Komisionerit do të hetojë çdo rast të shkeljes së ligjit nr. 9887/2008 “Për mbrojtjen e të dhënave personale” nga çdo subjekt zgjedhor apo operator ekonomik.
Zyra e Komisionerit, gjithashtu, u bën thirrje të gjithë subjekteve zgjedhore të ndalojnë menjëherë çdo përpunim të paligjshëm të të dhënave personale.
j.l./ dita
