Protesta e paralajmëruar e opozitës ka nisur dje me tensione para selisë së qeverisë. Fillimisht ka patur një përplasje mes drejtuesve të opozitës dhe forcave të policisë që kanë rrethuar godinën, ndërsa më pas drejt kryeministrisë janë lëshuar një seri bombash molotov.
Policia ka përdorur lëndë lotsjellëse për të sprapsur turmat.
Prej andej deputetët e opozitës lëvizën në formë marshimi. Gjatë rrugës, protestuesit i vunë flakën një stacioni autobusi, si dhe disa kazanëve të mbeturinave.
Ndalesa e rradhës ishte selia e Partisë Socialiste, ku një shi bombash molotov u lëshuan drejt godinës, ndërsa një banderolë e madhe me një foto të kryetarit dhe kryeministrit socialist Edi Rama, e vendosur në fasadën hyrëse, mori flakë. Policia ndërhyri për të shuar zjarrin si dhe përdori sërish gazin lotsjellës.
I njejti skenar u përsërit pak më pas, disa qindra metra më larg, pranë ndërtesës së Ministrisë së Brendshme e pak minuta më vonë dhe drejt Bashkisë së Tiranës, ku policia përdori dhe pompat e ujit për të larguar protestuesit.
Vendimi për organizimin e protestës së djeshme u mor nga PD e Berishës, pasi Gjykata e Apelit dënoi me një vit burgim deputetin Ervin Salianji. Ajo u parapri nga disa akte force të opozitës në parlament ku fillimisht deputetët e opozitës dogjën karriget e tyre, para godinës ku zhvillohen seancat. Pak ditë më pas tensionet mbetën të larta kur ata tentuan të pengojnë hyrjen e deputetëve të shumicës në sallën e parlamentit.
PD e Berishës, non grata dhe i pandehur për korrupsion, ka njoftuar se ajo po nis “një betejë pa kthim” e cila synon sipas saj, të garantojë votën e lirë të shqiptarëve, duke këmbëngulur në një qeveri teknike që të organizojë zgjedhjet e ardhshme parlamentare.
Eksponentë të ndryshëm të saj ditët e fundit në deklarata mediatike kanë përdorur tone të ashpra duke lënë të kuptojnë se çdo lloj reagimi është i justifikuar ndërsa kanë vënë në dukje dënimin e Salianjit të cilin e konsiderojnë si hakmarrje politike, apo moszbatimin nga shumica të vendimeve të Gjykatës Kushtetuese, në rastin e mandatit të ish ministres Xhaçka.
Mbi 1 mijë forca policisë u angazhuan mbrëmë për të mbrojtur institucionet përgjatë bulervardit qëndror të kryeqytetit. Mes tyre pati shumë të lënduar.
