Në mbledhjen e zhvilluar pak orë më parë nga Këshilli i Ministrave ndër vendimet e miratuara ishte edhe ai për ndryshimin e kritereve për certifikimin e subjekteve agroturistike.
Lidhur me miratimin e këtij vendimi, në përfundim të mbledhjes, ministrja e Bujqësisë, Frida Krifca ka konfirmuar se ndryshimet erdhën si pasojë e kërkesave nga grupet e interesit, për të përfituar nga paketa fiskale.
Me hyrjen në fuqi të kësaj pakete në janar të vitit 2019, subjekteve të agroturizmit i është reduktuar TVSH në 6%, ndërsa i është hequr edhe taksa e infrastrukturës.
“Bujqësia ka miratuar një vendim për ndryshimin e kritereve dhe procedurave për certifikimin e subjekteve agroturistike. Ka ardhur ky ndryshim si pasojë e kërkesave të grupeve të interesit, bujtinave, bizneseve familjare që duan të përfitojnë nga një politikë fiskale. Kemi bërë të mundur të japim një paketë fiskale që i favorizon ata me incentiva konkrete si TVSH 6%, taksa e infrastrukturës zero. Kjo ka ndihmuar agroturizmat të kenë interes të certifikohen që të përfitojnë nga kjo paketë fiskale. Janë 80 mln euro të ardhura të gjeneruara në vit nga agroturizmi i cili ndihmon bujqësinë sepse krijon një lloj magneti për të tërhequr rininë për të punuar në fshat për të qëndruar në vendlindjen e tyre”, tha Krifca.
p.k\dita
