Presidenti rus Vladimir Putin ka dhënë versionin e tij se aksidenti ajror që i mori jetën kreut të Wagner, Yevgeny Prigozhin, ishte shkaktuar nga shpërthimi i një granate dore brenda avionit.
Putin u shpreh se avioni i Prigozhin u hodh në erë nga brenda dhe nuk u godit nga një raketë, siç u pretendua fillimisht.
Sipas tij, në mbetjet e avionit u gjetën fragmente granatash dore.
“Fragmente granatash u gjetën në trupat e të vrarëve në aksident”, tha Putin në një takim në Soçi. “Nuk kishte asnjë goditje nga jashtë drejt aeroplanit, ky është një fakt i vërtetuar”, tha Putin.
Avioni privat Embraer, me të cilin Prigozhin po udhëtonte për në Shën Petersburg u rrëzua në veri të Moskës, duke vrarë të 10 personat në bord më 23 gusht.
Dy figura të tjera kryesore të Wagner-it, katër truprojat e Prigozhin dhe një ekuipazh prej tre personash vdiqën gjithashtu.
Putin nuk dha më shumë detaje se si një granatë ose granata mund të ishin shpërthyer në bordin e avionit ekzekutiv, por tha se ai mendonte se hetuesit kishin gabuar që nuk kishin kryer teste alkooli dhe droge në trupat e atyre që vdiqën në përplasje.
j.l./ dita
