Strukturave publike të shëndetit në vend i shtohen edhe 66 mjekë të rinj, punësimi i të cilëve është bërë nëpërmjet konkurrimit të zhvilluar në portalin e punësimit “Mjekë për Shqipërinë”.
Në takimin e zhvilluar me mjekët e rinj të punësuar në këtë fillim viti në qendrat shëndetësore dhe strukturat spitalore, ministrja e Shëndetësisë dhe Mbrojtjes Sociale, Ogerta Manastirli, është ndalur edhe tek politikat e rritjes së pagave.
Sipas saj, sikundër edhe është konfirmuar për mjekët specialistë rritja e pagave për këtë vit është me 50 mijë lekë më shumë, ndërkohë që për mjekët e familjes dhe infermierët rritja është në masën 7 për qind.
Ministrja Manastirliu bëri e dije se rritja e targetuar do të vijojë edhe përgjatë vitit të ardhshëm, ku përfitues do të jenë mjekët e përgjithshëm dhe infermierët.
“Do të kemi këtë vit një rritje të targetuar të pagave për mjekët specialist, paga bazë e të cilëve do të rritet me 500 dollarë. Gjithashtu, do të rrisim pagën siç e kemi premtuar, edhe për mjekët dhe infermierët tanë në masën 7 për qind këtë vit. Duke filluar nga viti 2024, ne do të kemi sërish rritje page të targetuar për mjekët e familjes, mjekët e përgjithshëm dhe infermierët tanë, për të garantuar që politika e rritjes së pagave të jetë një politikë e qëndrueshme”, deklaroi ministrja Manastirliu.
Gjatë takimit me 66 mjekët e rinj, ministrja foli edhe për sistemin transparent të rekrutimit të punonjësve të shëndetësisë në qendrat shëndetësore dhe spitalet e vendit.
“Unë jam krenare për punën që është bërë në drejtim të mundësisë që tashmë mjekët dhe infermierët tanë kanë për t’u punësuar me transparencë dhe meritë në sistemin shëndetësor publik. Ju jeni profesionistët më të rinj brenda sistemit. Jeni 66 mjekë të përgjithshëm dhe specialistë që përgjatë këtyre muajve të parë të vitit 2023 i jeni bashkuar sistemit tonë shëndetësor publik në kujdesin parësor dhe në atë spitalor”, shtoi ministrja Manastirliu.
p.k\dita
