Autoritetet e dikasterit të Shëndetësisë kanë konfirmuar nisjen e procedurave për rekrutimin e mjekëve të shërbimit të urgjencës në disa prej spitaleve bashkiake të vendit. Bluzat e bardha të këtij specialiteti që do të pranojnë të shkojnë për të punuar në këto spitale, krahas pagës mujore do të trajtohen edhe me bonusin e mjekut.
Në shpalljen e hapur, Ministria e Shëndetësisë dhe Mbrojtjes Sociale skonfirmon vende vakante për mjekë në shërbimet e urgjencës, në spitalet bashkiake të Kolonjës, Tropojës, Delvinës dhe Skraparit. Këto shërbime aktualisht janë të pambuluara me mjekë të këtij specialiteti.
Për të aplikuar në këto vende pune, kandidatët duhet të të plotësojnë kushtet për pranim, që janë: “Të kenë diplomën e mjekësisë të lëshuar nga institucioni i arsimit të lartë brenda apo jashtë shtetit, të njohur nga ministria përgjegjëse për arsimin, të jenë të pajisur me lejen e ushtrimit të profesionit, so dhe të mos jenë të dënuar për vepra penale me vendim të formës së prerë”.
Krahas plotësimit të aplikimit online në portalin “Mjekë për Shqipërinë”, kandidatët duhet të dorëzojnë pranë Ministrisë së Shëndetësisë dhe Mbrojtjes Sociale, dokumentat si në vijim:Lejen e ushtrimit të profesionit (e detyrueshme), vërtetim nga njësia administrative për vendbanimin, Kanditatët që janë të punësuar në institucionet shëndetësore publike, duhet të paraqesin leje nga institucioni ku punojnë për pjesëmarrje në programin e bonusit. Data 25 mars është edhe afati i fundit për dorëzimin e dokumentacionit të aplikimit për këto vende vakante nga të gjithë kandidatët e interesuar.
Komisioni i Vlerësimit për aplikantët në programin e bonusit administron dokumentet e aplikantëve, zhvillon intervistën me kandidatët, zgjedh fituesin dhe përcakton masën e financimit të bonusit mbi bazën e përcaktimeve të urdhërit të Ministrit të Shëndetësisë dhe Mbrojtjes Sociale. Mjeku që fiton nga programi i bonusit lidh kontratë me Ministrinë e Shëndetësisë dhe Mbrojtjes Sociale, me institucionin shëndetësor ku do të punojë dhe me Drejtorinë Rajonale të Fondit të Sigurimeve të Detyrueshme të Kujdesit Shëndetësor.
p.k\dita
