Pak orë para ndeshjes së kthimit mes Napolit dhe Eintracht Frankfurt, qyteti italian u kthye i gjithi në një zonë lufte, sikur të ishte Ukraina. Dy tifozëritë më të egra në rruzull janë përplasur me njëra-tjetrën në akte të paprecedenta dhune, zjarri dhe shkatërrimi, sa edhe autoritetet e rendit janë dorëzuar përpara këtyre skenave horror. Frika e autoriteteve ligjzbatuese të sigurisë për ndeshjen u kthye në realitet, teksa deri dhe një orë para ndeshjes pati përplasje fizike dhe me forcat e policisë. Tensionet u shtuan pas ankesave të gjermanëve për numrin e ulët të biletave për tifozërinë e tyre, teksa mijëra ultras kanë udhëtuar nga Frankfurti, duke ‘pushtuar’ Napolin dhe janë konfrontuar dhunshëm me tifozërinë vendase dhe me forcat e rendit.
Çudia ka qenë se gjermanëve u janë bashkuar edhe ‘vëllezërit nga Atalanta”, që janë armiq të betuar të napoletanëve. Dhe shkatërrimet nisën që nga zona e bregdetit, rezidenca e hoteleve dhe deri në qendër apo pranë stadiumit. Nuk munguan edhe përleshjet apo incidentet me tifozët vendas. 800 agjentë policie tentuan të vendosnin rregullin, por më kot. Të paktën 200 ultras napoletanë janë konfrontuar me tifozët gjermanë dhe ata bergamaskë nëpër rrugët e qytetit. Policia u përpoq disa herë të ndërhynte, por mori një ‘lumë’ gurësh e sendesh të forta.. Dhuna e ka kolapsuar tërësisht qytetin, deri pak para ndeshjes në “El Maradona”. Janë lënduar shumë njerëz dhe djegur makina apo shkatërruar deri dhe dyqane. Situata u cilësua si jashtë kontrollit, por nuk u deklaruan rreziqe për zhvillimin e ndeshjes.
