Astrofizikantët thanë se dy stuhi të reja diellore kanë goditur fuqishëm Tokën ditët e fundit dhe të tjera janë në rrugë e sipër. Më 19 prill, NASA njoftoi se dy stuhi të fuqishme diellore kishin shpërthyer nga Dielli, në një kurs drejt Tokës. Kulmi i flakërimeve arriti një ditë më parë, sipas vëzhgimeve nga Observatori Dinamik Diellor i NASA-s. Këto ndezje mund të zgjasin minuta ose orë dhe të ndikojnë në gjithçka, nga rrjeti elektrik, te komunikimet me radio dhe sinjalet e navigimit. Ato paraqesin një rrezik të veçantë për çdo astronaut në orbitë. Më keq, për shkak se rrezatimi elektromagnetik i dëmshëm udhëton me shpejtësinë e dritës, në kohën kur shohim një shpërthim që vjen, ai tashmë është këtu. Dhe mbartin rreze radioaktive nga të gjitha spektret, kryesisht ato vdekjeprurëse “Gama”. Shtresa e Ozonit e mbron njerëzimin nga këto goditje elektromagnetike, por pasojat reflektohen sipas shkallës e forcës së goditjes, në teknologji. Kjo masë koronale e quajtur edhe CME, përbën rrezik edhe në vijimësi, por shkencëtarët thonë se deri tani nuk ka të dhëna për katastrofa apo shqetësim real. Por ka precedentë me pasoja. Ato e kanë goditur planetin tonë më shumë se një herë. Në shtator të vitit 1859, një stuhi e fortë diellore goditi planetin, duke shkatërruar teknologjitë e reja të komunikimit. Kishte raporte se linjat telegrafike ishin aq të ndezura sa të paktën një zyrë telegrafike shpërtheu në flakë. Sigurisht, shoqëria moderne mbështetet shumë më tepër në teknologjitë e komunikimit dhe një ngjarje e ngjashme sot do të ishte shumë më katastrofike dhe me pasoja të paimagjinueshme fizike dhe financiare. Aktualisht këto stuhi janë rezultati i dritave të veriut, apo siç i quajmë ndryshe “aurorat boreale”, si produkt i përplasjes së rrezeve radioaktive me atmosferën apo shtresat mbrojtëse të tokës (fusha elektromagnetike), duke prodhuar drita shumëngjyrëshe dhe spektakolare.
