Këngëtarja e famshme, Marinella ka ndërruar jetë në moshën 87 vjeçare. Sipas mediave greke, zonja e madhe e këngës dhe muzikës greke ndërroi jetë në shtëpinë e saj. Lajmin e hidhur e ka bërë të ditur familja e saj në një deklaratë:
Marinella lë pas një vepër muzikore të paçmuar, pasi e ka gdhendur emrin e saj në historinë e këngës greke për afërsisht 70 vjet. Familja e saj ka kërkuar privatësi në këto momente zie. Marinella u rrëzua në skenën e Herodionit më 25 shtator, pak minuta pas fillimit të koncertit të saj, pasi kishte pësuar një goditje të rëndë në tru.
Interpretuesja e shkëlqyer po këndonte hitin “Ego kai Esyi”, kënga e dytë në repertorin e saj, kur papritmas filloi të dridhej dhe u shemb në skenë para syve të tmerruar të spektatorëve që kishin vërshuar teatrin për të dëgjuar hitet e mëdha të artistes. Diagnoza e parë e mjekëve ishte se Marinella kishte pësuar një goditje të rëndë në tru. Që nga momenti kur u rrëzua deri sa u dërgua në spital, këngëtarja mbajti kontaktin me mjedisin.
Interpretuesja e madhe kishte qenë e lodhur në ditët e mëparshme të provave, siç njihet perfeksionizmi i saj. Zonja e madhe e këngës greke kishte pasur një dhimbje të tmerrshme koke para koncertit.Por pavarësisht përpjekjeve të gjata të mjekëve dhe luftës së saj, këngëtarja e madhe greke nuk ia doli dot ta fitonte këtë betejë shëndeti.
Kush ishte Marinella dhe karriera e saj
Marinella, e lindur me emrin Kyriaki Papadopoulou më 20 maj 1938 në Selanik, tregoi talentin e saj për këngën që në moshë të vogël. Karriera e saj filloi në skenat muzikore të Selanikut në fund të viteve 1950, ndërsa në vitin 1957 u zhvendos në Athinë dhe debutoi në diskografi. Një nga momentet e njohura të karrierës së saj ishte martesa dhe bashkëpunimi me Stelios Kazantzidis, me të cilin krijoi disa nga hitet më të mëdha të kohës.
Pas ndarjes nga Kazantzidis, Marinella zhvilloi një karrierë të pavarur dhe u konsolidua si një nga interpretuestet më të mëdha greke, duke bashkëpunuar me emra të mëdhenj si Manos Hadjidakis, Stavros Xarchakos, Giorgos Hadzinasios, Mimis Plessas, Giorgos Dalaras, Antonis Remos dhe të tjerë.
Diskografia e saj përfshin mbi 40 albume personale dhe dhjetëra hite të paharrueshme si “Dashuria nuk njeh kufij”, “Stalia stalia” dhe “Den einai pou fyegis”. Marinella përfaqësoi Greqinë në Eurovision në vitin 1974 dhe realizoi performanca të mëdha në skenat muzikore dhe teatrale gjatë viteve ’80 dhe ’90.
j.l./ dita
